2 ივნისს მომხდარი ავტოსაგზაო შემთხვევის შედეგად მტკვარში გადავარდნილი ავტომობილის მძღოლის ცხედარი სამაშველო სამსახურმა იპოვა.

"მეხანძრე-მაშველებმა 14-დღიანი უწყვეტი საძიებო სამუშაოების შედეგად 2 ივნისს მომხდარი ავტოსაგზაო შემთხვევის დროს მდინარე მტკვარში გადავარდნილი ავტომობილის მძღოლის ცხედარი იპოვეს.

საძიებო სამუშაოები თბილისისა და რუსთავის მასშტაბით, მტკვრის სანაპიროებზე 24-საათიან რეჟიმში უწყვეტად მიმდინარეობდა. მასში ყოველდღიურად ჩართული იყო საგანგებო სიტუაციების მართვის სამსახურის 100-ზე მეტი მეხანძრე-მაშველი, მყვინთავთა ჯგუფები, შესაბამისი ტექნიკითა და სპეციალური აღჭურვილობით.

ცხედარი წყლიდან უკვე ამოსვენებულია და მიმდინარეობს შესაბამისი სამართლებრივი პროცედურები," — ვკითხულობთ საგანგებო სიტოაციების მართვის სამსახურის განცხადებაში.

4 ივნისს ავტოსაგზაო შემთხვევასთან დაკავშირებით ერთი პირი დააკავეს. შინაგან საქმეთა სამინისტროს ინფორმაციით, 2 ივნისს ბრალდებული ავტომობილს მართავდა, რა დროსაც იქვე მოძრავ ავტომობილებს შეეჯახა, რის შემდეგაც ერთ-ერთი ავტომობილის მძღოლმა საჭე ვერ დაიმორჩილა და მდინარე მტკვარში გადავარდა.