ევროკავშირის გაფართოების პოლიტიკაში დაგეგმილ ცვლილებებს, რომელთა მიხედვითაც ახალ წევრებს ეროვნული ვეტოს უფლება 15 წლით შეეზღუდებათ, პარლამენტის ვიცესპიკერი ნინო წილოსანი გამოეხმაურა. მისი თქმით, ბრიუსელის მხრიდან ორმხრივი შეთანხმებების დარღვევა და ორმაგი სტანდარტების გამოყენება ჯერ კიდევ საქართველოს მიერ ეროვნული კანონმდებლობის მიღების პროცესში გამოიკვეთა.

წილოსანის განცხადებით, საქართველო პარტნიორების მხრიდან არაპროპორციული წნეხის ქვეშ აღმოჩნდა.

"მთელ ამ პროცესში ჩვენ დავინახეთ არა მხოლოდ ახლა, არამედ სწორედ მაშინ, როდესაც საქართველომ თავისი ეროვნული კანონმდებლობის მიღებაც კი ვერ შეძლო ისე, რომ სასწაული ზეწოლის და შანტაჟის ობიექტი არ გამხდარიყო ევროკავშირის პოლიტიკოსების თუ ბიუროკრატების მხრიდან, ზუსტად იმ მომენტში დაიწყო ევროკავშირის ბიუროკრატიამ იმ ურთიერთმოლაპარაკებული, ორმხრივად შეთანხმებული პირობების დარღვევა, რომელიც საქართველოს და ამ დიდ კავშირს ჰქონდა", — თქვა წილოსანმა.

ნინო წილოსანმა ხაზგასმით აღნიშნა, რომ ქვეყანას ჰქონდა სუვერენული უფლება მიეღო საკუთარი კანონები, რომლებიც თავისი არსით დასავლურ ღირებულებებს არ ეწინააღმდეგებოდა.

"ჩვენ გვქონდა უფლება, რომ ჩვენი ეროვნული კანონმდებლობა მიგვეღო, ამ კანონმდებლობით არ ვეწინააღმდეგებოდით არაფერს ევროპულს და დასავლურს, თუმცა ამის მიუხედავად იყო უთანასწორო და რაც მთავარია, ორმაგი სტანდარტებით ნაკარნახევი გადაწყვეტილებები მიღებული", — განაცხადა წილოსანმა.

წილოსანი მიიჩნევს, რომ ევროკავშირის მიერ შემოთავაზებული ახალი მოდელი არსებითად ცვლის იმ პირველად პირობებს, რომლებზეც ქვეყანამ თავის დროზე თანხმობა განაცხადა.

"ეს ყველაფერი გრძელდება იმით, რომ დღეს ჩვენ გვესმის, როგორ უუფლებო წევრების მიღებას აპირებენ გაფართოების შემთხვევაში და ეს ნამდვილად არ არის ის, რაზეც ჩვენ მოვილაპარაკეთ თავის დროზე, როდესაც ასოცირებას მოვაწერეთ ხელი, როდესაც კონსტიტუციაში ჩავწერეთ 78-ე მუხლი...", — განაცხად ნინო წილოსანმა.

შეგახსენებთ, ევროკავშირის ახალი წევრები, გაწევრიანების ხელშეკრულებებში გათვალისწინებული ახალი "დამცავი" პუნქტების საფუძველზე, 15 წელზე მეტი ხნით ეროვნული ვეტოს უფლებას დაკარგავენ. ამის შესახებ ევროკავშირის კომისარმა გაფართოების საკითხებში, მარტა კოსმა განაცხადა.