პოლონეთის ქალაქ ბიალა პოდლასკაში ოპოზიციონერი რუსი მხატვარი და სატირიკოსი სემიონ სკრეპეცკი (ნამდვილი სახელი — რობერტ კუზოვკოვი) ცეცხლსასროლი იარაღით მოკლეს.

პოლიციის ცნობით, 44 წლის რუსეთის მოქალაქეს საცხოვრებელი კორპუსის მიმდებარე ავტოსადგომზე ესროლეს. სამართალდამცველებს ოფიციალურად არ დაუსახელებიათ დაღუპულის ვინაობა, თუმცა ადგილობრივი მედიასაშუალებები ირწმუნებიან, რომ მსხვერპლი სწორედ სემიონ სკრეპეცკია.

ტელეარხ wPolsce24-ის ინფორმაციით, თავდამსხმელმა მხატვარს ახლო დისტანციიდან რამდენჯერმე ესროლა. ადგილზე მისულმა სასწრაფო დახმარების ექიმებმა მისი გადარჩენა ვერ შეძლეს. მკვლელობის შემდეგ, პოლიციამ ქალაქიდან გასასვლელი გზები გადაკეტა, ხოლო სკოლები და საბავშვო ბაღები, სადაც შესაძლოა მისი შვილები ყოფილიყვნენ, დამატებითი დაცვის ქვეშ მოაქცია.

გავრცელებული ცნობებით, თავდასხმაში, სავარაუდოდ, ორი ადამიანი მონაწილეობდა. ერთ-ერთი ეჭვმიტანილი ბიალა პოდლასკაში, ბელარუსის საკონსულოსთან, დააკავეს. არაოფიციალური ინფორმაციით, ის ბელარუსის მოქალაქეა. პოლიცია მეორე ეჭვმიტანილს ამ დრომდე ეძებს.

ბელარუსული ოპოზიციური არხი DzikMedia იუწყება, რომ სავარაუდო თავდამსხმელები შემთხვევის ადგილზე ბელარუსმა ტაქსის მძღოლმა მიიყვანა. მათ მიერ იარაღის გამოჩენის შემდეგ მძღოლი პანიკაში ჩავარდა და გაქცევა სცადა ბელარუსის საკონსულოს მიმართულებით.

სემიონ სკრეპეცკი ალთაის რეგიონში იყო დაბადებული და ცნობილი გახდა პოლიტიკოსების სატირული კარიკატურებით. მის ნამუშევრებში ხშირად ფიგურირებდნენ რუსეთის პრეზიდენტი ვლადიმირ პუტინი, ბელარუსის ლიდერი ალექსანდრ ლუკაშენკო, ჩეჩნეთის ლიდერი რამზან კადიროვი და გარდაცვლილი რუსი ოპოზიციონერი ალექსეი ნავალნი. ცნობისთვის, iStories-ის თანახმად, სკრეპეცკი ასევე აკრიტიკებდა უკრაინის ხელისუფლებას და შეტანილი იყო უკრაინის "მიროტვორეცის" მონაცემთა ბაზაში, რომელიც უკრაინის ეროვნული უსაფრთხოების წინააღმდეგ ჩადენილ დანაშაულებში ბრალდებულ პირებს განსაზღვრავს.

მედიის ცნობით, სიკვდილამდე სამი დღით ადრე, რუსეთის დღეს, სკრეპეცკი ბერლინში გაემგზავრა, სადაც მან იოსებ სტალინისა და პუტინის კარიკატურით ერთკაციანი საპროტესტო აქცია გამართა.

სკრეპეცკი პოლონეთში 2021 წლიდან ცხოვრობდა.