შინაგან საქმეთა სამინისტროს ინფორმაციით, დააკავეს პირი, რომელმაც 39 სასაფლაო გაქურდა. უწყების ინფორმაციით, დაკავებული ახმეტის, თელავისა და გურჯაანის რაიონებში ძარცვავდა სასაფლაოებს.

"სამართალდამცველებმა თელავის რაიონის სოფელ კისის ხევში, ცენტრალურ საავტომობილო გზაზე შეაჩერეს ფოლკსვაგენ პასატის მოდელის ავტომანქანა, რომელსაც 1985 წელს დაბადებული გ.ე. მართავდა. პოლიციამ ავტომანქანის საბარგულში საფლავის მესერის ალუმინის ნაკეთობები აღმოაჩინა, რომლებიც ბრალდებულს დანაშაულებრივი გზით ჰქონდა მოპოვებული", — აღნიშნულია შსს-ს განცხადებაში.

საქმეზე გამოძიება სისხლის სამართლის კოდექსის 177-ე მუხლის მეორე ნაწილის "ა" ქვეპუნქტითა და 381 მუხლის პირველი ნაწილით მიმდინარეობს. ამ მუხლებით ქურდობისა და სასამართლოს გადაწყვეტილების შეუსრულებლობისთვის სამიდან ხუთ წლამდე პატიმრობაა გათვალისწინებული.