ჯანმრთელობის მსოფლიო ორგანიზაცია (WHO) საქართველოს ურჩევს მოსახლეობის ჯანმრთელობა თამბაქოს ინდუსტრიის ინტერესების ზეგავლენისგან დაიცვას. მათ მიაჩნიათ, რომ ამისთვის თამბაქოს ახალი პროდუქტებისა და ელ-სიგარეტების მიმართ რეგულაციების შენარჩუნებაა საჭირო. ინფორმაციას WHO-ს საქართველოს ოფისი ავრცელებს.

ორგანიზაციის განცხადებით, საქართველომ აიღო პასუხისმგებლობა თამბაქოს კონტროლის ჩარჩოს კონვენცია დაიცვას. ამ კონვენციის 5.3 მუხლის მოთხოვნა კი არის თამბაქოს კონტროლის სახელმწიფო პოლიტიკა თამბაქოს ინდუსტრიის ინტერესებისაგან დაიცვას. მათი თქმით, საქართველოს პასუხისმგებლობაა ამ საკითხთან დაკავშირებით, კანონის კანონქვემდებარე ნორმატიული აქტის გამოსცეს. მათივე თქმით, შესაბამისი დოკუმენტი უკვე შემუშავებულია და საქართველოს ხელისუფლებას უახლოეს პერიოდში მისი ოფიციალურად დამტკიცებისა და რეალიზაციისკენ მოუწოდებენ.

ორგანიზაციაში ამბობენ, რომ ახლო მომავალში საქართველოში იგრძნობენ იმ ცვლილებების ეფექტს, რაც თამბაქოს მოხმარების პრევენციამ გამოიწვია. მათივე თქმით, აღნიშნული ღონისძიებებით და რეგულაციებით ათობით ათასი საქართველოს მოქალაქე გადარჩება და 15 წლიან პერსპექტივაში 3,6 მილიარდი ლარი დაიზოგება.

ჯანდაცვის მსოფლიო ორგანიზაციის ინფორმაციით, ე.წ. ახალი თამბაქოს ნაწარმი და ელ-სიგარეტები მომხმარებელთა ახალ სეგმენტებს იზიდავს და მოწევის დაწყების საშუალებაა, რაც საბოლოო ჯამში კიდევ უფრო ზრდის ნიკოტინდამოკიდებულების მასშტაბებს. მათი თქმით, ეს პროდუქტები შეიცავენ და/ან მოხმარებისას გამოყოფენ ჯანმრთელობაზე მავნე ზეგავლენის მქონე ნივთიერებებს. მათივე თქმით, არ არსებობს საკმარისი მტკიცებულებები, რომ ეს პროდუქტები მოწევაზე თავის დანებების საშუალებაა და პირიქით, მათ შემადგენლობაში არსებული ნიკოტინი დამოკიდებულებას იწვევს.