თბილისში წლიდან წლამდე, სულ უფრო მეტი ადამიანი ამბობს უარს საზოგადოებრივ ტრანსპორტზე და მანქანით მგზავრობას ირჩევს. ხუთ წელიწადში ასე მგზავრების 12 პროცენტი მოიქცა. საქართველოში მანქანების რაოდენობა ყოველ წელს 10 პროცენტით იზრდება. ავტომობილების 36-ზე მეტი პროცენტი თბილისშია რეგისტირებული (2016 წ.). მეტ მანქანას კიდევ უფრო ფართო გზები და მეტი სადგომი სივრცე სჭირდება. ამიტომ, ქრება ის, რაც მანამდე ყველასი იყო - გზების მშენებლობებს ტროტუარები და სხვა საჯარო სივრცეები ეწირება. ასე გაქრა თავისუფალი სივრცე მზიურის პარკში, იპოდრომზე, იუსტიციის სახლთან და სხვა ტერიტორიებიდან. იქ ახლა გზებია და პარკინგი.

ქუჩებზე აქა-იქ, ტროტუარი საერთოდ არ არის, ან შუაში წყდება და მანქანის სავალ გზაზე რჩები. როცა ეტლით სარგებლობ, ტროტუარის კიდესთან იჭედები, ვერც მიწისქვეშაში ჩადიხარ — ქალაქში მხოლოდ ორ მიწისქვეშას აქვს სპეციალური ლიფტენი — ვაკის პარკთან და ოპერის წინ. იქაც ხშირად გაფუჭებულია.

ტროტუარებს მშენებლობებიც ხერგავს. ფეხით სავალ გზაზე იჭრება კომერციული ობიექტებიც.

მაგრამ პირველი, რაც თბილისს მანქანების ქალაქად აქცევს - მოშლილი საზოგადოებრივი ტრანსპორტია.

სატრანსპორტო ქსელი საქართველოს დამოუკიდებლობის მოპოვების შემდეგ, მალევე მოირღვა. ინდუსტრიულმა ზონებმა ფუნქცია დაკარგეს. პერიფერიულ რაიონებში - დიდ დიღომში, ვარკეთილში, გლდანში, მუხიანში დასახლებები გაიზარდა, ბიზნესის უდიდესმა ნაწილმა ცენტრალურ უბნებში მოიყარა თავი, გაჩნდა ახალი ზონები - ელიავას და ლილოს ბაზრობები, დიდუბის და ვაგზლის ავტოსადგურები, მოგვიანებით ისთ ფოინთი, თბილისი მოლი და სხვა - მგზავრთა ნაკადებიც ამ ახალი ზონებისკენ დროთა განმავლობაში სულ უფრო გაიზარდა და გზებზე ხერგილები გაჩნდა.

დამოუკიდებლობის პირველივე წლებში ტრამვაისა და ტროლებუსის ხაზები აიყარა და ქალაქს ამორტიზებული ავტობუსების შემცირებული რაოდენობა დარჩა. მეტროს ხაზების განვითარება საერთოდ შეჩერდა.

ქალაქი არასაკმარისი რაოდენობის ამორტიზებული ავტობუსების და პოსტ-საბჭოთა ქალაქებში გავრცელებული "მარშუტკების" ამარა დარჩა, რომლებსაც 2011 წლიდან — შპს თბილისის მიკროავტობუსი მართავს. ყველაზე მეტი ადამიანი კერძო მანქანების შემდეგ, დღემდე სწორედ მარშუტკებს დაჰყავს. ამ კომპანიასთან ქალაქის ხელისუფლების კონტრაქტს ვადა მხოლოდ 2032 წელს ეწურება. ესეც რომ არა, "მარშუტკების" ჩანაცვლება თბილისის მეტროსა და ავტობუსების ქსელს ჯერ მაინც არ შეუძლია — მგზავრების ნაკადს არც მეტროს ვაგონები ჰყოფნის, არც ავტობუსები.

წარმოიდგინე, დიდ დიღომში ცხოვრობ, ან ვაკეში - მეტრო შენს ყოველდღიურ მარშრუტში სრულფასოვნად ვერაფრით ჩაეწერება. არადა, ვაკე და დიდი დიღომი თბილისის თითქმის ყველაზე მჭიდროდ დასახლებული და დიდი უბნებია.

მასალის სრულ ვერსიას შეგიძლიათ გაეცნოთ On.ge-ს პარტნიორ ინდიგოს ვებგვერდზე.