ჟანგისგან გაწითლებული, მაგრამ ჯერ კიდევ ცოცხალი - ეს ჭიათურის საბჭოთა დროინდელი საბაგირო გზაა. "რკინის კუბოები" შესაძლებელია მოშლილია, მაგრამ ის დღემდე გთავაზობთ საინტერესო მგზავრობას უნიკალური ხედებით. ასე გვიამბობს ისტორიას ჭიათურის საბაგიროების შესახებ ბრიტანული გამოცემა The Guardian.

სტატია გარდიანის რუბრიკებში - ქართული არდადეგები, ან დიდებული პატარა ადგილები, რომლებიც ვიცი შეგიძლიათ იხილოთ. სტატია კინოდოკუმენტალისტ ქლოუი ვაითს ეკუთვნის. ქლოე გვიამბობს, რომ ჭიათურამ მისი ყურადღება მაშინ მიიქცია, როცა არიელ კლეიმანმა გადაწყვიტა საკუთარი ფილმი გადაეღო ქალაქში, რომლის ხედებიც კი დეკორაციას ჰგავს.

"როცა ბნელ მეტალის ყუთში დგახარ, რომელშიც მზის ცხელი ნაკადი რამდენიმე პატარა ფანჯრიდან აღწევს, თანაც მიწიდან 20 მეტრის სიმაღლეზე და ძველ დაჟანგულ კაბელზე ხარ ჩამოკიდებული, მარტივი მისახვედრია, რატომ დაარქვეს კლაუსტროფობიით შეპრყობილებმა ჭიათურის საბაგიროს რკინის კუბოები"- ასე აღწერს ქლოუი ვაითი საბაგიროთი სეირნობისას განცდილ ემოციას, თან გაოცებას ვერ მალავს იმ ფაქტით, რომ ამდენად ძველი საბაგირო ახერხებს ფუნქციონირებას და ის უსაფრთხოდ ადის მთაზე, საიდანაც ქალაქის მშვენიერი ხედი იშლება.

ამის შემდეგ კი გარდიანი მკითხველს უამბობს ჭიათურის ისტორიას, აღნიშნავს ქალაქის გეოგრაფიულ მდებარეობას და განავრცობს, რომ საბჭოთა მთავრობამ საბაგირო გზები იმისთვის შექმნა, რათა მოძრაობა გაემარტივებინა. ავტორი ასევე გვიამბობს პირველ საბაგიროზე, რომელიც 1945 წელს აიგო. ის აღნიშნავს, რომ უმოქმედო, დაზიანებული საბაგიროები საბჭოთა ინჟინრების ოპტიმისტურ ხედვას ჰგავს, ალტერნატიულ მომავალზე. ერთ-ერთ საბაგიროს კი 60-იანი წლების კომიქსების მანქანას ადარებს, ვინაიდან ის მთლიანად მეტალის არ არის და მინის ჭერი ჭიათურის ცის დანახვის საშუალებას იძლევა.

ფოტო: Alamy

"ჭიათურა გამოიყურება და გრძნობს თავს, თქვენი მოლოდინებისგან განსხვავებულად, როგორც ძველი, საბჭოთა, მეშახტეთა ქალაქი სამრეწველო ნაგებობებით და საცხოვრებელი სახლებით, რომლებიც ძირითადად პასტელურ ფერებშია შეღებილი."

როგორც ჩანს, დოკუმენტალისტი მხოლოდ ჭიათურის ხედებმა არ დააკმაყოფილა და მღვიმელის მონასტერი და კაცხის სვეტიც მოინახულა.

"სოფლის ლამაზ ბუნებაში ავტობუსით რამდენიმე წუთიანი მოგზაურობის შემდეგ კაცხის სვეტი შეგიძლიათ იხილოთ. ეს არის უცნაური კლდე. უნიკალური ქართული დამწერლობის აღმოჩენის შემდეგ, მეცნიერებმა სვეტის ასაკის დადგენა შეძლეს. კლდეზე თხელი კიბით შეგიძლიათ ასვლა. მაგრამ ფრთხილად! ასვლა დაშვებულია მხოლოდ მამაკაცებისთვის!"

სტატია მთავრდება ტრადიციული საკითხით, რომელიც უცხოურ ტურისტებს ყველაზე მეტად ხიბლავთ საქართველოში- სამზარეულო. ჟურნალისტი აღიარებს, რომ მთელ საქართველოში ყველაზე გემრიელი სამზარეულო მან ჭიათურაში დააგემოვნა, განსაკუთრებით კი გამოყოფს ლობიოს, ყველიან პურს და "პელმენის წვნიანს" და რაც მთავარია, ის გასცემს რეკომენდაციას ეს ყველაფერი ქართული სახლის ღვინით დააგვირგვინონ.