საქართველომ ვენესუელის ოპოზიციის ლიდერი, ხუან გუაიდო დროებით პრეზიდენტად აღიარა. შესაბამისი განცხადება საგარეო საქმეთა მინისტრმა დავით ზალკალიანმა ტვიტერის გვერდზე გამოაქვეყნა, სადაც აღნიშნა ისიც, რომ იგი მიესალმება საქართველოს პარტნიორების მხარდამჭერ განცხადებებს და მხარს უჭერს ვენესუელას, თავისუფლებისა და დემოკრატიისთვის ბრძოლაში.

საგარეო საქმეთა სამინისტროს განცხადებაში ნათქვამია, რომ საქართველო არ აღიარებს ვენესუელის პრეზიდენტის ნიკოლას მადუროს ახალ მანდატს:

"საქართველო, როგორც საერთაშორისო საზოგადოების წევრი, არ აღიარებს 2018 წლის 20 მაისს ჩატარებულ ვენესუელის საპრეზიდენტო არჩევნების შედეგებს. არჩევნები გაიმართა უთანასწორო, უსამართლო და არადემოკრატიულ გარემოში".

ვენესუელის პრეზიდენტად ხუან გუაიდო პირველად ამერიკის შეერთებულმა შტატებმა აღიარა, შემდეგ კი კანადამ, კოლუმბიამ, პერუმ, ბრაზილიამ, არგენტინამ, ჩილემ, პარაგვაიმ და ბოლივიამ.

ბოლო სამი დღის განმავლობაში, ვენესუელა ფართო საზოგადოებრივმა პროტესტმა მოიცვა. მოსახლეობა ქვეყნის ამჟამინდელი პრეზიდენტის ნიკოლას მადუროს გადადგომას მოითხოვდა. კარაკასში გამართულ მიტინგზე გუაიდომ მადურო არალეგიტიმურ პრეზიდენტად გამოაცხადა. გუაიდომ აღნიშნა, რომ ხელისუფლების უზურპაციის დასასრულებლად და სამართლიანი არჩევნების ჩასატარებლად პრეზიდენტის მოვალეობებს გარდამავალ პერიოდში თავად შეასრულებს.

ადგილობრივი მედიის ინფორმაციით, ბოლო დღეებში მიმდინარე საპროტესტო აქციებს სულ 4 ადამიანი ემსხვერპლა. პროტესტების ახალი ტალღა ქვეყანაში მას შემდეგ დაიწყო, რაც თავდაცვის სამინისტრომ შეუმდგარი სამხედრო გადატრიალების შესახებ გაავრცელა ინფორმაცია. საპროტესტო მოძრაობას სათავეში, სწორედ ხუან გუაიდო ჩაუდგა, რომელიც აქტიურად მოუწოდებდა მის მხარდამჭერებს ებრძოლად ნიკოლას მადუროს წინააღმდეგ.

ნიკოლას მადურო, ვენესუელას პრეზიდენტად პირველად 2013 წელს აირჩიეს. 2018 წელს 1 300 000%-იანი ინფლაციის მიუხედავად, ნიკოლას მადურო უკვე მეორედ გახდა ქვეყნის პრეზიდენტი, თუმცა არჩევნების შედეგები არალეგიტიმურად ცნო დემოკრატიული სახელმწიფოების ნაწილმა. მადუროს არალეგიტიმურ პრეზიდენტად მიიჩნევს საქართველოს ხელისუფლებაც.

ვენესუელა და საქართველოს ოკუპირებული ტერიტორიები

10 იანვარს აფხაზეთისა და სამხრეთ ოსეთის დე ფაქტო რესპუბლიკების პრეზიდენტები ვენესუელაში პრეზიდენტ ნიკოლას მადუროს ინაუგურაციაზე დასასწრებად კარაკასში ჩავიდნენ. ვენესუელა ერთ-ერთი იმ ხუთ ქვეყანას შორის, რომელმაც აფხაზეთისა და სამხრეთ ოსეთის დე ფაქტო რესპუბლიკები აღიარა. 2008 წლის აგვისტოს ომის შემდეგ რესპუბლიკები რუსეთმა, ნაურუმ, ნიკარაგუამ და სირიამაც აღიარეს.

ამავე თემაზე: