თავდაცვის ყოფილი მინისტრი ლევან იზორია დღეს, 23 ივლისს პროკურატურაში სოფელ ჩორჩანაში გიორგი გახარიას შინაგან საქმეთა მინისტრობისას საგუშაგოს აღმართვასთან დაკავშირებით გამოიკითხა. როგორც ლევან იზორიამ გამოკითხვის შემდეგ ჟურნალისტებს განუცხადა, ჩორჩანაში საგუშაგოს გახნა მედიიდან გაგო.

"ძირითადი კითხვა მდგომარეობდა იმაში, ვიყავი თუ არა ინფორმირებული ე.წ. ჩორჩანას ეპიზოდთან დაკავშირებით. ჩემი პასუხი იყო, რომ ამაზე ინფორმაცია, არ გამაჩნდა, არც არაოფიციალური, და მით უფრო, არც ფორმალური, ეს იქნებოდა მთავრობის სხდომა, თუ განსაკუთრებით, უსაფრთხოების საბჭოს ფარგლებში, ასეთი განხილვა არ ყოფილა.

განსაკუთრებით მინდა, ბოლო გარემოებას მივაპყრო თქვენი ყურადღება — 2019 წელს, აპრილის თვეში შეიქმნა უსაფრთხოების საბჭო, რომელიც პასუხისმგებელია უსაფრთხოებასთან დაკავშირებული პრობლემების ანალიზზე, მათ პრევენციაზე და რა თქმა უნდა, პოლიტიკის დაგეგმვაზე. მეც, როგორც თავდაცვის მინისტრი, ვიყავი ამ საბჭოს მუდმივმოქმედი წევრი, კანონმდებლობა ითვალისწინებს 3 თვეში ერთხელ მაინც შეკრებას. მუდმივ წევრს აქვს უფლება, თავისი ინიციატივით მიმართოს პრემიერმინისტრს და ჩაატაროს სხდომა, თუმცა მახსენდება მხოლოდ ერთი — 1-ელ მაისს...

მე [ჩორჩანას საგუშაგოს გახსნის შესახებ] გავიგე საჯარო ინფორმაციის საფუძველზე, მასმედიის საშუალებით, როდესაც განთავსდა კონკრეტული საგუშაგო, კონკრეტულ პოზიციაზე" — თქვა ლევან იზორიამ.

როგორც მან აღნიშნა, ამ გადაწყვეტილებამ "ქვეყანა სავალალო მდგომარეობამდე მიიყვანა" და ამით გიორგი გახარიას პასუხისმგებლობაზე მიანიშნა.

"სამწუხაროდ, მივიღეთ ცუდი შედეგი, ბუნებრივია, ჩვენი ქვეყნის უსაფრთხოების ინტერესები, მისი ტერიტორიული მთლიანობა, მით უფრო ასეთი ოკუპაციის დროს, არის ყველაზე მნიშვნელოვანი პრიორიტეტი და ბუნებრივია, როდესაც მიღებული გადაწყვეტილებების საფუძველზე ვიღებთ სავალალო შედეგებს, მორიგი ტერიტორიების დაკარგვასთან დაკავშირებით, სამწუხარო ფაქტია," — თქვა იზორიამ.

ცნობისთვის, აღნიშნულ საქმესთან დაკავშირებით გუშინ, 22 ივლისს პროკურატურაში გამოიკითხა თავდაცვის ძალების ყოფილი მეთაური, ვლადიმერ ჩაჩიბაიაც. მისი თქმით, ინფორმაცია აქვს, რომ "ტერიტორიები დაიკარგა", თუმცა არ იცის, რა ხდება ამის მიღმა.

"რომ ვიყო ობიექტური და არ მოგატყუოთ, არ ვიცოდი ჩორჩანასთან დაკავშირებით რა ხდებოდა. ეს გავიგე გავიგე მეორე დღეს. სამსახურში როდესაც მივედი, 09:00 საათზე, მაშინ გამაგებინეს, რომ ჩორჩანაში რაღაც ხდებოდა.

პროცესი როდის დაიწყო, ზუსტად არ ვიცი. დილით სამსახურში რომ მივედი, ჩემმა თანამშრომლებმა დამახვედრეს ინფორმაცია, შესაბამისად, ჩვენც დავინტერესდით აღნიშნული საკითხით, გავატარეთ შესაბამისი ღონისძიება თავდაცვის ძალებში... ნებისმიერი შემთხვევისთვის მზად რომ ვყოფილიყავით, ჩავატარეთ თათბირი იმისათვის, რომ თავდაცვის მინისტრისა და მთავრობის მეთაურის ბრძანების შემთხვევაში მზად ვყოფილიყავით.

ფრთხილად უნდა მოვეკიდოთ საკითხს, რომელმაც შეიძლება გამოიწვიოს კონფლიქტის ესკალაცია. ინფორმაცია რაც მაქვს, ტერიტორიები დაიკარგა, ამის მიღმა რა ხდება მე არ ვიცი," — თქვა ჩაჩიბაიამ.

ცნობისთვის, პროკურატურაში გამოძიება საბოტაჟის, დამამძიმებელ გარემოებაში საბოტაჟის მცდელობის, უცხოეთის ორგანიზაციისათვის, უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების, საქართველოს კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზების ფაქტზე მიმდინარეობს საქართველოს სისხლის სამართლის კოდექსის 318-ე მუხლის პირველი ნაწილით, 19, 318-ე მუხლის მეორე ნაწილით, 319-ე და 321-ე პრიმა მუხლის მე-2 ნაწილის ,"ა" ქვეპუნქტით.

ასევე იხილეთ: