ვენესუელას პარლამენტის თავმჯდომარემ, ხუან გუაიდომ საკუთარი თავი ქვეყნის პრეზიდენტის მოვალეობის შემსრულებლად გამოაცხადა. ინფორმაციას ამის შესახებ CNN ავრცელებს. ხუან გუაიდოს გადაწყვეტილებას მხარი დაუჭირა აშშ-ს პრეზიდენტმა, დონალდ ტრამპმა და გუაიდო ქვეყნის ოფიციალურ და ლეგიტიმურ მმართველად ცნო.

ფოტო: bbc.com

ბოლო სამი დღის განმავლობაში, ვენესუელა ფართო საზოგადოებრივმა პროტესტმა მოიცვა. მოსახლეობა ქვეყნის ამჟამინდელი პრეზიდენტის ნიკოლას მადუროს გადადგომას მოითხოვს. კარაკასში გამართულ მიტინგზე ხუან გუაიდომ ნიკოლას მადურო არალეგიტიმურ პრეზიდენტად გამოაცხადა. გუაიდომ განაცხადა, რომ ხელისუფლების უზურპაციის დასასრულებლად და სამართლიანი არჩევნების ჩასატარებლად პრეზიდენტის მოვალეობებს გარდამავალ პერიოდში თავად შეასრულებს.

ადგილობრივი მედიის ინფორმაციით, ბოლო დღეებში მიმდინარე საპროტესტო აქციებს სულ 4 ადამიანი ემსხვერპლა. პროტესტების ახალი ტალღა ქვეყანაში მას შემდეგ დაიწყო, რაც თავდაცვის სამინისტრომ შეუმდგარი სამხედრო გადატრიალების შესახებ გაავრცელა ინფორმაცია. საპროტესტო მოძრაობას სათავეში, სწორედ ხუან გუაიდო ჩაუდგა, რომელიც აქტიურად მოუწოდებდა მის მხარდამჭერებს ებრძოლათ ნიკოლას მადუროს წინააღმდეგ.

ამავდროულად მმართველი პარტიის და მადუროს მიერ კონტროლირებადი უმაღლესი სასამართლოს გადაწყვეტილებით დაიწყო აქციის ორგანიზატორების სისხლის სამართლებრივი დევნა. გადატრიალების თავიდან ასაცილებლად მადურომ, საკუთარ მომხრეებს ქუჩაში გამოსვლისკენ მოუწოდა.

გუაიდოს გადაწყვეტილებაზე სპეციალური ვიდეომიმართვა გაავრცელა აშშ-ს ვიცე პრეზიდენტმა მაიკ პენსმაც. პენსმა ნიკოლას მადურო დიქტატორად მოიხსენია და ვენესუელის მოსახლეობას სრული მხარდაჭერა აღუთქვა.

ნიკოლას მადურო, ვენესუელას პრეზიდენტად პირველად 2013 წელს აირჩიეს. 2018 წელს 1 300 000%-იანი ინფლაციის მიუხედავად, ნიკოლას მადურო უკვე მეორედ გახდა ქვეყნის პრეზიდენტი, თუმცა არჩევნების შედეგები არალეგიტიმურად ცნო დემოკრატიული სახელმწიფოების ნაწილმა. მადუროს არალეგიტიმურ პრეზიდენტად მიიჩნევს საქართველოს ხელისუფლებაც.

ბოლო წლების განმავლობაში ვენესუელაში უმძიმესი პოლიტიკური და ეკონომიკური კრიზისია. ქვეყანაში შექმნილი უმძიმესი ჰუმანიტარული მდგომარეობის გამო ორ მილიონზე მეტი მოქალაქე დევნილად იქცა. 2016 წლის განმავლობაში ვენესუელის ერთმა მოქალაქემ წონაში საშუალოდ 9 კილოგრამი დაიკლო.

ამავე თემაზე: ვენესუელა ქაოსის ზღვარზე – დეტალები მოკლედ