გაეროს ქალთა ორგანიზაციის 2018 წლის კვლევაში ნათქვამია, რომ ზრდასრული ქალების 21 პროცენტი და პროდუქტიული ასაკის ქალების 27 პროცენტი თავს დიასახლისად აღიქვამს. ამის საპირისპიროდ, როგორც მთლიანი მოსახლეობის, ისე პროდუქტიული ასაკის კაცების ერთ პროცენტზე ნაკლები თავის ძირითად საქმიანობად საოჯახო საქმეებს ასახელებს.

კვლევის ავტორების ცნობით, პროდუქტიული ასაკის ყოველი მეოთხე ქალი საქართველოში საკუთარ თავს დიასახლისად მიიჩნევს, მაშინ, როცა მხოლოდ რამდენიმე კაცი ამბობს იმავეს საკუთარ თავზე.

"ეს მიუთითებს, რომ ქალების ეკონომიკური არააქტიურობის ძირითადი მიზეზი სამუშაო ძალის გენდერული დაყოფა და აუნაზღაურებელი მოვლა, აბრკოლებს ქალებს მუშაობაში. აღნიშნულ მოსაზრებას ამყარებს იმ ქალების პასუხები, რომლებიც ამბობენ, რომ არ მუშაობენ", — ნათქვამია კვლევაში.

ფოტო: გაეროს ქალთა ორგანიზაცია

ამავე კვლევის მიხედვით, ქალების 40 პროცენტი აღნიშნავს, რომ ისინი არ მუშაობენ "პირადი და ოჯახური მიზეზების" გამო; ეს მაჩვენებელი 22 პროცენტია კაცების შემთხვევაში. ქალების 24 პროცენტს ურჩევნია დარჩეს სახლში და იზრუნოს შვილებზე. შესაბამისად, არ იმუშაოს; კაცების შემთხვევაში კი მხოლოდ 2 პროცენტი ისურვებდა იმავეს.

ხუთიდან ერთი ქალი, რომელიც ამბობს რომ არ მუშაობს, აღნიშნავს, რომ მათი მეუღლეების სურვილია ისინი სახლში დარჩნენ. შედარებისთვის, კაცების შემთხვევაში იგივე სურვილი აქვს ორმოცდაათიდან ერთს.

ამავე კვლევის მიხედვით, იმ ქალების 6 პროცენტი, რომლებიც ამბობენ, რომ არ მუშაობენ, მიზეზად ასახელებს ბავშვთა მოვლის ხელმიუწვდომლობას ან დაბალ ხარისხს, კაცების შემთხვევაში კი ეს მაჩვენებელი 1 პროცენტია. კვლევის პერიოდში, კაცების 1 პროცენტზე ნაკლები და ქალების 5 პროცენტი იმყოფებოდა დეკრეტულ შვებულებაში. ქალების 4 პროცენტმა აღნიშნა, რომ ისინი უვლიდნენ შვილიშვილებს, მოხუც ახლობლებს, ან შეზღუდული შესაძლებლობის მქონე ნათესავებს და, შესაბამისად, არ მუშაობდნენ; კაცების შემთხვევაში კი აღნიშნული მიზეზი დაასახელა მხოლოდ 1 პროცენტმა.

"საერთო ჯამში, ქალების მიერ დასახელებული მიზეზები ერთნაირია როგორც თბილისის, ისე სხვა ქალაქებისა და სოფლებისათვის. თუმცა, ქალები სხვა ურბანულ დასახლებებში უფრო ხშირად მიუთითებენ, რომ შესაფერისი სამსახურის პოვნა ძნელია", — ნათქვამია კვლევაში.