თბილისის მერია 2019 წლის საახალწლო ღონისძიებებში 1 778 800 ლარს ხარჯავს. ყველა მომსახურებას ის ტენდერის გარეშე, პირდაპირი წესით შეისყიდის.

ამ თანხიდან 138 ათას ლარზე მეტი ცენტრალური ნაძვის ხის ანთების ღონისძიებას მოხმარდა, ნახევარ მილიონზე მეტი კი 31 დეკემბერს დაგეგმილ ღონისძიებაზე იხარჯება.

ფოტო: ფოტო მერიის ბრძანებიდან

28 დეკემბრიდან 7 იანვრის ჩათვლით მერია გეგმავს "საახალწლო ქალაქისა" და ყველა ასაკობრივი ჯგუფისთვის ღონისძიებების მოწყობას. გარდა ამისა, განთავსდება ღია კინოთეატრი, თოვლის ბაბუის სახლი, ჩატარდება თეატრალური წარმოდგენები, სხვადასხვა ბენდების კონცერტები, ელექტრონული ლაივ-შოუები, მსვლელობები კოსტიუმირებული მსახიობებისა და მუსიკოსების მონაწილეობით.

"სტუმრების განწყობას აამაღლებს თოვლის ბაბუა დამხმარე მსახიობთან ერთად, ბავშვებს შესაძლებლობა ექნებათ გადაიღონ ფოტო თოვლის ბაბუასთან, რომელიც მათ უსასყიდლოდ გადაეცემათ. მოეწყობა სინთეტიკური საციგურაო მოედანი", — განმარტავენ მერიაში.

31 დეკემბერს მთავარ ნაძვის ხესთან გაიმართება გალა კონცერტი, რომელშიც მონაწილეობას მიიღებენ ევგენი მიქელაძის სახელობის ეროვნული მუსიკალური ორკესტრი ნიკოლოზ რაჭველის დირიჟორობით, მუსიკალური ჯგუფები, ბენდები, ესტრადის სოლო მომღერლები და მოცეკვავეები.

საახალწლო ღონისძიებების ფარგლებში 2-7 იანვარს გაიმართება გამოფენა-გაყიდვა "საშობაო ბაზარი". ღონისძიებაში მონაწილეობას მიიღებენ თბილისში რეგისტრირებული მიკრო და მცირე მეწარმეები, რომლებსაც ექნებათ შესაძლებლობა წარმოადგინონ საახალწლო თემატიკის პროდუქცია.

გასულ წელს თბილისის მერიამ საახალწლო ღონისძიებებში 2,7 მილიონ ლარზე მეტი დახარჯა.