მედიის თავისუფლების ინდექსით 2016 წელს საქართველო 64-ე ადგილზეა. ანგარიშს რეპორტიორები საზღვრებს გარეშე აქვეყნებს.

ანგარიშიდან ირკვევა, რომ წინა წელთან შედარებით, საქართველომ რეიტინგში წინ 5 ადგილით წაიწია, თუმცა, ეს მედია გარემოს გაუმჯობესებას არ ნიშნავს. სიაში საქართველოს 5 ადგილით წინ აღმოჩენა სხვა ქვეყნების მდგომარეობის გაუარესების ხარჯზე მოხდა. რაც შეეხება საქართველოს სარეიტინგო ქულას, ის 27.70 ქულიდან 27.96-მდე მცირედით გაუარესდა:

"ბოლო წლებში განხორციელებულმა რეფორმებმა საქართველოში მედია გარემო გააუმჯობესა, რაც გამოიხატა მედიის მფლობელთა გამჭვირვალობითა და თანამგზავრული მაუწყებლობის პლურალიზმით. ჟურნალისტების წინააღმდეგ ძალადობა ნაკლებად ხშირია, თუმცა მედიაში მათ მიმართ მუქარები ხშირად შუქდება. მიუხედავად ამისა, მედია კვლავ პოლარიზებულია და მედია მფლობელები ისევ გადაწყვეტილების მიმღებ პირებად რჩებიან რედაქციაში. ასევე, მთავარი ტელეკომპანიების მფლობელობასთან დაკავშირებული დავა არის წუხილის მთავარი მიზეზი სამომავლო პლურალიზმთან დაკავშირებით”.

ანგარიშის თანახმად, პოსტსაბჭოთა ქვეყნების ორი მესამედი მედიის თავისუფლების კუთხით შედგენილ რეიტინგში, 150-ე ან უფრო დაბალ ადგილებს ინარჩუნებენ.

როგორც ახალმა კვლევამ აჩვენა, მცირე ცვლილება იყო რეგიონის 4 ქვეყანაში, მათ შორის, საქართველოში, რომელიც 64-ე ადგილზეა, სომხეთში, რომელიც 74-ე ადგილზეა, მოლდოვაში, რომელიც 76-ე ადგილზეა და ყირგიზეთში, რომელშიც 85 ადგილზეა. მიუხედავად იმისა, რომ ამ 4 ქვეყნებში არსებულ სიტუაციებს შორის ძალიან დიდი განსხვავებაა, მათ საერთო მაინც აქვთ მედიის პოლარიზაციისა და მედიის დამოუკიდებლობის გამოწვევებში:

"ის ფაქტი, რომ რუსეთმა გააუმჯობესა თავისი მედიის თავისუფლების იდნექსი (148) არც ისე იმედის მომცემია, რადგან ის დევნის კრიტიკოსებს, რომელმაც ბოლო 3 დეკადის განმავლობაში უპრეცედენტო დონეს მიაღწია".

კვლევის მიხედვით, 2015 წელს, პრესის თავისუფლების ინდექსის მკვეთრი დაცემის შემდეგ, როდესაც მაიდანი დაარბიეს და ქვეყნის აღმოსავლეთით საბრძოლო მოქმედებები დაიწყო, უკრაინამ ნახტომი გააკეთა და 22 ადგილით წინ, 107-ე პოზიცია დაიკავა. მიუხედავად ამისა, ქვეყანაში კვლავ რჩება დიდი გამოწვევები მედიაში ოლიგარქების ძალაუფლებისა და რუსეთთან საინფორმაციო ომის წარმოების სახით.

მედიის დამოუკიდებლობის მხრივ, რეგიონში თურქეთმა 151-ე ადგილი დაიკავა სირიის კონფლიქტისა და ქურთ ამბოხებულებთან ბრძოლის გამო. ხოლო, უზბეკეთი (166), ყაზახეთი (160) თურქმენეთი(178), აზერბაიჯანი(163) და ბელარუსი (157) ბოლო ადგილებს იკავებენ. როგორც ანგარიშში წერია, ამ ქვეყნებში წარმოსახვითი საფრთხეებითა და ასეთივე სტაბილურობით, დესპოტ მმართველობებს საშუალება ეძლევათ ძალაუფლება წლების განმავლობაში შეინარჩუნონ.