ჩეხეთი რუსეთს კიბერთავდასხმაში ადანაშაულებს. ქვეყნის ინფორმაციისა და უსაფრთხების (BIS) სამსახურის 2017 წლის ანგარიშის მიხედვით, თავდასხმის ობიექტი იყო ჩეხეთის საგარეო საქმეთა და თავდაცვის სამინისტროები. ეს პირველი შემთხვევა არაა, როდესაც ევროპის ქვეყნები რუსეთს კიბერთავდასხმაში ადანაშაულებენ.

BBC-ის რუსული სამსახურის ინფორმაციით, ანგარიშში აღნიშნულია, რომ ყველაზე ძლიერი თავდასხმა 2016 წლის დასაწყისიდან 2017 წლის დასაწყისამდე გრძელდებოდა. BIS-ის თქმით, ჰაკერებმა საგარეო უწყების 150-მდე თანამშრომლის მეილიდან წერილები და ფაილები გადაიწერეს.

"ასე მათ მოიპოვეს მონაცემები, რომლებიც მომავალი კიბერთავდასხმისთვის შეიძლება იყოს გამოყენებული", — ნათქვამია ანგარიშში.

ჩეხეთის სპეცსამსახურები თავდასხმაში Turla-ს, რუსულენოვანი ჰაკერების ძველ ჯგუფს ადანაშაულებენ. ამ ჯგუფის მსხვერპლებს შორის არიან ხელისუფლების ორგანოები და კერძო კომპანიები, რომლებსაც თავდაცვის სფეროსთან აქვთ კავშირი.

რაც შეეხება თავდაცვის სამინისტროს, ჰაკერებმა შეძლეს უწყებისა და არმიის ქსელის მისამართი შეეცვალათ და ამ მისამართზე X-Agent ვირუსის განთავსება. ამ თავდასხმას ჩეხეთის სამსახურები ჰაკერულ ჯგუფ Fancy Bear-ს უკავშირებენ. მათივე თქმით, ორივე თავდასხმის უკან რუსეთი დგას.

2018 წლის ოქტომბერში ჩეხეთში საგარეო საქმეთა სამინისტროზე კიბერთავდასხმაში ბრალდებული რუსეთისა და ვიეტნამის რვა მოქალაქე დააკავეს. ამავე წლის თებერვალში გერმანული მედია წერდა, რომ გერმანიის თავდაცვისა და საგარეო უწყებებზე რუსმა ჰაკერებმა თავდასხმა განახორციელეს. რუსეთის მხრიდან კიბერთავდასხმაზე განაცხადა ნიდერლანდების სამეფომ.