ნიდერლანდების ხელისუფლებამ განაცხადა, რომ 2018 წლის აპრილში კიბერთავდასხმის მცდელობისთვის ქვეყნიდან ოთხი რუსი გააძევა, წერს BBC. როგორც ხელისუფლება განმარტავს, მათ ჰააგაში ქიმიური იარაღის აკრძალვის ორგანიზაციაზე სურდათ თავდასხმა.

ნიდერლანდებში განაცხადეს, რომ თავდასხმა რუსეთის დაზვერვის სამსახურმა დაგეგმა.

მიმდინარე წლის გაზაფხულზე ქიმიური იარაღის აკრძალვის ორგანიზაცია იძიებდა სოლსბერიში სკრიპალებზე თავდასხმის შემთხვევას. დიდი ბრიტანეთის ხელისუფლებამ თავდასხმაზე პასუხისმგებლობა რუსეთს დააკისრა. გარდა ამისა, ორგანიზაცია იძიებდა ქიმიურ თავდასხმებს სირიაში, რომელშიც დასავლეთმა ბაშარ ასადის ხელისუფლება დაადანაშაულა. რუსეთი ორივე ბრალდებას უარყოფს.

როგორც BBC-ის რუსული ბიურო წერს, ორგანიზაციაში რუსეთის წარმომადგენელი ნიდერლანდების გადაწყვეტილების შეფასებაზე უარს ამბობს.