"მე არასდროს მისაუბრია რუსეთთან თანამშრომლობაზე", — ამის შესახებ პრეზიდენტობის გამარჯვებულმა კანდიდატმა, სალომე ზურაბიშვილმა BBC-ის რუსულ სამსახურთან ინტერვიუს დროს განაცხადა. კითხვაზე, როგორ გეგმავს ის ბალანსის შენარჩუნებას, ევროპასთან და რუსეთთან ურთიერთობისას, ზურაბიშვილი პასუხობს, რომ "ყალბი ამბავი" გავრცელდა, თითქოს მას რუსეთთან ურთიერთობის დაბალანსება სურს.

"მე არ მგონია, რომ სანამ რუსეთი ასე იქცევა საოკუპაციო ხაზზე, სადაც ყოველ დღე იტაცებენ ადამიანებს და სანამ ეს ხაზი, ეს მუდმივი საფრთხე ჩვენი ტერიტორიების სიღრმეში შემოდის, თბილისთან უფრო და უფრო ახლოს, ასევე, იმის გათვალისწინებით, როგორ იქცევა რუსეთი უკრაინასთან მიმართებით, არ მგონია, რომ ჩვენ თანამშრომლობას შევძლებთ", — ამბობს სალომე ზურაბიშვილი.

მისივე თქმით, თუკი დასავლელი, ევროპელი ან ამერიკელი პარტნიორები დიალოგს დაიწყებენ რუსეთთან, რაიმე ფორმით, "საქართველოც მათ გვერდით იქნება".

კითხვაზე, "ვინ არის თქვენთვის ვლადიმერ პუტინი"? — ზურაბიშვილი პასუხობს, რომ როცა ის მოლაპარაკებებს აწარმოებდა მის [პუტინის] საგარეო საქმეთა მინისტრთან, რუსული ბაზების გაყვანის შესახებ, მაშინ, "შესაძლოა, ის სულ სხვა ვლადიმერ პუტინი იყო, ვიდრე დღესაა".

"მაშინ რუსეთი დათანხმდა საკუთარი ბაზები საქართველოს ტერიტორიიდან გაეყვანა. არ მგონია, რომ ეს ახლა ისევ განმეორდება, მიუხედავად იმისა, რომ მე ისევ იგივე დიპლომატიური უნარები მაქვს. ვფიქრობ, ახლა, რუსეთ-საქართველოს 2008 წლის ომის შემდეგ, მაშინ, როცა რუსეთი საქართველოს ორ ოკუპირებულ ტერიტორიას დამოუკიდებლად აღიარებს, რუსეთთან დიალოგის ყველა შანსი დაბლოკილია".

ზურაბიშვილი მიიჩნევს, რომ რუსეთთან დიალოგი მომავალში შეიძლება, მაგრამ, როგორც ამბობს, "ჩვენ ეს მარტომ არ უნდა გავაკეთოთ".

"ეს უნდა იყოს საერთო დიალოგის ნაწილი. თუ ეს მოხდება, ეს ჩვენი პარტნიორების მხარდაჭერით უნდა მოხდეს. ჩვენ ჩვენი პოზიცია უნდა დავაფიქსიროთ ევროპელ პარტნიორებთან. თუკი ისინი დაიწყებენ რუსეთთან დიალოგს, ჩვენ უნდა დავრწმუნდეთ, რომ საქართველო განზე არ დარჩება, რომ საქართველოს პრინციპები — სუვერენიტეტი, ტერიტორიული მთლიანობა — იქნება დაცული, როგორც მოლაპარაკებების ნაწილი".