გერმანიის პარლამენტის საგარეო ურთიერთობათა კომიტეტის თავმჯდომარე, მიხაილ როთი ეუთოს საპარლამენტო ასამბლეის პრეზიდენტს, პია კაუმას თბილისში დაგეგმილ ვიზიტს "სერიოზულ შეცდომას" უწოდებს. მისი განცხადებით, ევროკავშირმა, ევროსაბჭომ და ეუთო-მ თავისუფალი და სამართლიანი ახალი არჩევნები უნდა მოითხოვონ.

"ეუთო-ს საპარლამენტო ასამბლეამ არ უნდა მოახდინოს გაყალბებული არჩევნების შედეგად წარმოშობილი არალეგიტიმური პრეზიდენტის, მთავრობისა და პარლამენტის ლეგიტიმაცია. ევროკავშირმა, ევროსაბჭომ და ეუთო-მ უნდა მოითხოვოს თავისუფალი და სამართლიანი ახალი არჩევნები. ეს არის ერთადერთი გამოსავალი ღრმა კრიზისიდან!" — წერს როთი X-ზე.

ეუთოს საპარლამენტო ასამბლეის პრეზიდენტს, პია კაუმას ვიზიტი თბილისში 8-10 იანვარსაა დაგეგმილი. აღნიშნულს გამოეხმაურა ლატვიელი ევროპარლამენტარი რიჰარდს კოლსი, რომელმაც X-ზე დაწერა, რომ ეს „კატასტროფული და ცუდ დროს შერჩეული ნაბიჯია“. რესპუბლიკელმა კონგრესმენა, ჯო უილსონმა კაუმას წერილით მიმართა და მოუწოდა, არ ჩავიდეს თბილისში.

OSCE PA-ს პრეზიდენტს განცხადებით მიმართავს 3 კოალიცია — კოალიცია ცვლილებისთვის, ერთიანობა-ნაციონალური მოძრაობა და ძლიერი საქართველო და საქართველოში დაგეგმილი ვიზიტის გადადებისკენ მოუწოდებს. კაუმას წერილით მიმართა გახარია საქართველოსთვის ლიდერმაც და მოუწოდა გადახედოს ვიზიტის დროსა და მიზანს.