"უი, გაცოცხლდნენ, ამოვიდნენ სარდაფებიდან?" — აღნიშნული განცხადება თბილისის მერმა მას შემდეგ გაავრცელა, რაც ჟურნალისტმა ვალების ჩამოწერასთან დაკავშირებით არასამთავრობო ორგანიზაციების პოზიციაზე დაუსვა კითხვა. საქმე ეხება მთავრობის ინიციატივას, რომელიც სამოქალაქო სექტორმა გააკრიტიკა და ამომრჩევლის შესაძლო მოსყიდვა უწოდა.

კალაძე არასამთავრობო ორგანიზაციების დისკრედიტაციას განაგრძობს და ამბობს, რომ მათ ნაწილს ნაციონალური მოძრაობის ნარატივი აქვს.

"ზოგ შემთხვევაში საერთოდ არ აკეთებდნენ განცხადებებს, როდესაც მათი მოვალეობა და უფლებამოსილება იყო, რომ გაეკეთებინათ განცხადებები იმ საარჩევნო კამპანიის ხელის შეშლებზე, რაც ხდებოდა მთელი ამ ხნის განმავლობაში", — განაცხადა კალაძემ.

თბილისის მერის თქმითვე, რთულია ვალების ჩამოწერის ინიციატივის არჩევნებთან დაკავშირება. კალაძის განცხადებით, ჭარბვალიანობის თემას დიდი ხნის განმავლობაში, არჩევნების თარიღის გამოცხადებამდეც განიხილავდნენ და ამაზე პარტიის თავმჯდომარე, ბიძინა ივანიშვილი და პრემიერ-მინისტრი, მამუკა ბახტაძეც საუბრობდნენ.

"პირველ ტურში რომ დამთავრებულიყო არჩევნები და მერე გამოცხადებულიყო ეს გადაწყვეტილება, მაშინ რას იტყოდნენ. საერთოდ არანაირი კავშირი არ აქვს, თუმცა, თუ არის რაიმე კითხვები, შესაბამისი სამსახურები დაინტერესდებიან, ალბათ", — განაცხადა თბილისის მერმა.

არჩევნების მეორე ტურამდე რამდენიმე დღით ადრე მთავრობა "შავ სიაში" მყოფ 600 ათასი ადამიანს ჯამში 1,5 მილიარდის ოდენობის დავალიანებას უნულებს. საჭირო ფინანსური ტვირთი კი სრულად ქართუ ჯგუფმა იკისრა.

პირობები, რომელსაც ვალის ჩამოსაწერად პირი უნდა აკმაყოფილებდეს:

  • თითოეულ ფინანსურ კომპანიაში ვალის ძირი თანხის მოცულობა არ უნდა აღემატებოდეს 2 000 ლარს, თუმცა შესაძლოა, ჯამში 2 000 ლარზე გაცილებით მეტი იყოს;
  • მინიმუმ ბოლო ერთი წლის განმავლობაში არ გადაუხდია სესხის ნაწილი;
  • ფინანსთა მინისტრის, ივანე მაჭავარიანის თქმით, მიკროსაფინანსო კომპანი ვივუსის კლიენტებს დავალიანება არ გაუნულდებათ. მინისტრის განმარტებით, კომპანია მოლაპარაკებების პირობებს არ დათანხმდა.

სამართლიანი არჩევნების აღმასრულებელი დირექტორი, მიხეილ ბენიძე მიიჩნევს, რომ მთავრობის ინიციატივა ვალების ჩამოწერის შესახებ ამომრჩევლის მოსყიდვაა. მისივე თქმით, 100 ლარზე მეტი ოდენობის თანხით მოსყიდვაზე პასუხისმგებელია პროკურატურა და უწყება საქმით უნდა დაინტერესდეს. ამავე პოზიციაზეა საქართველოს ახალგაზრდა იურისტთა ასოციაციის აღმასრულებელი დირექტორი, ირმა პავლიაშვილიც. იგი აცხადებს, რომ ვალების ჩამოწერის გეგმა ამომრჩევლის მოსყიდვის ნიშნებს შეიცავს.

ვალების ჩამოწერაზე მთავრობის ინიციატივას პროკურატურა შეისწავლის. მათი თქმით, დანაშაულის ნიშნების არსებობის შემთხვევაში შესაბამის გადაწყვეტილებას მიიღებენ.