მიკროსაფინანსო კომპანია ვივუსის განცხადებით, დავალიანების ჩამოწერასთან დაკავშირევით ფინანსთა სამინისტრომ, მათთვის უცნობი მიზეზით, კომპანიასთან კონტაქტი შეწყვიტა. როგორც კომპანია განცხადებაში განმარტავს, ინიციატივასთან დაკავშირებით სამინისტრო მათ ორი კვირის წინ დაუკავშირდა.

როგორც განცხადებაში ვკითხულობთ, სესხების შესაძლოა, გამოსყიდვასთან დაკავშირებით კომპანიამ პორტფელის მონაცემები და პირობები სამინისტროს გადაუგზავნა:

"გასული კვირის დასაწყისში პორტფელის ნაწილზე ჩვენ კიდევ ერთხელ გავუგზავნეთ ფინანსთა სამინისტროს ელექტრონული ფოსტით ჩვენი წინადადება, რომელიც, ჩვენი აზრით სრულად ჯდებოდა სამინისტროს მიერ გაჟღერებულ პირობათა ჩარჩოში".

კომპანიის განმარტებით, სწორედ ამის შემდეგ სამინისტრომ მათთან კონტაქტი შეწყვიტა. ვივუსი აცხადებს, რომ გაჟღერებული მოლაპარაკებების პირობებში მზად არიან მოლაპარაკებები აწარმოონ.

დღეს, 19 ნოემბრის საგანგებო ბრიფინგზე პრემიერმა მამუკა ბახტაძემ ე.წ. შავ სიაში მყოფი 600 ათასი ადამიანისთვის ჯამში 1,5 მილიარდი ლარის ვალის განულებაზე ისაუბრა. პრემიერის ბრიფინგმა ბევრი პასუხგაუცემელი კითხვა დატოვა, თუმცა ნათელი იყო ვის ჩამოეწერება დავალიანება.

ფინანსთა მინისტრმა ივანე მაჭავარიანმა ვალის ჩამოწერის პირობებზე ისაუბრა.

პირობები, რომელსაც ვალის ჩამოსაწერად პირი უნდა აკმაყოფილებდეს:

  • თითოეულ ფინანსურ კომპანიაში ვალის ძირი თანხის მოცულობა არ უნდა აღემატებოდეს 2 000 ლარს, თუმცა შესაძლოა, ჯამში 2 000 ლარზე გაცილებით მეტი იყოს;
  • მინიმუმ ბოლო ერთი წლის განმავლობაში არ გადახდილა სესხის ნაწილი.

ვის არ ჩამოეწერება ვალი:

  • ვივუსის კლიენტებს. ფინანსთა მინისტრის თქმით, ამ კომპანიასთან ვერ შეთანხმდნენ;
  • ვისი ვალის ძირი თანხაც 2 000 ლარს აჭარბებს.

ბახტაძის ინფორმაციით, ე.წ. შავ სიაში მყოფილი ადამიანების 95 პროცენტს სწორედ 2 000 ლარამდე "ძირი თანხის" მქონე დავალიანება აქვთ.