პირველი მსოფლიო ომის დასრულებიდან ზუსტად ასი წელი გავიდა და ამ თარიღის აღსანიშნავად ილიაუნიში სიმპოზიუმი ჩატარდა. ღონისძიება ავსტრიის საელჩოსა და ილიაუნის ერთობლივი ორგანიზებით შედგა. მასში მონაწილეობას იღებდნენ იმ ქვეყნების ელჩები, რომლებიც პირველ მსოფლიო ომში იყვნენ ჩართულნი.

სიმპოზიუმს, მოწვეული სტუმრების გარდა, უნივერსიტეტის სტუდენტებიც ესწრებოდნენ. თითოეულმა ელჩმა მისი ქვეყნის პერსპექტივიდან დანახული ომის შესახებ ისაუბრა და აუდიტორიას ის გამოცდილება გაუზიარა, რომელიც ევროპამ პირველი მასშტაბური ომის შემდეგ მიიღო.

პირველ მსოფლიო ომს 20 მილიონამდე ადამიანი შეეწირა. დაინგრა იმპერიები, შეიქმნა ახალი სახელმწიფოები - მთელი გეოპოლიტიკური ვითარება სრულიად შეიცვალა. დაიწყო რევოლუციები, მათ შორის რუსეთში ოქტომბრის რევოლუცია, რომლის შედეგებმაც საბჭოთა რუსეთის ფედერაციის შექმნა გამოიწვია. 1921 წელს კი, რსფსრ-მ საქართველოს პირველი დემოკრატიული რესპუბლიკის ანექსია მოახდინა.

სიმპოზიუმის ერთ-ერთი მთავარი განხილვის თემა სწორედ ეს საკითხი იყო. ელჩებმა ასევე ისაუბრეს მეორე მსოფლიო ომის დაწყების მიზეზებზეც. მათი აზრით, პირველი მსოფლიო ომის შედეგების არასწორმა გადააზრებამ მსოფლიო მეორე კატასტროფამდე მიიყვანა.

ფოტო: ილიაუნი

"სიმპოზიუმზე განვიხილეთ ისეთი მნიშვნელოვანი თემები, როგორიცაა პირველი მსოფლიო ომის შედეგები და კავშირი საქართველოსთან, რაც ჩვენთვის განსაკუთრებულად საინტერესოა. ღონისძიებას იმ ქვეყნების ელჩები ესწრებოდნენ, რომლებიც ამ ომში იღებდნენ მონაწილეობას", - განაცხადა ილიაუნის რექტორმა, გიგა ზედანიამ.

ავსტრიის ელჩის თქმით, სიმპოზიუმის ჩატარება ძალიან მნიშვნელოვანია როგორც საქართველოსთვის, ისე სხვა ქვეყნებისთვისაც. მან აღნიშნა, რომ პირველი მსოფლიო ომის დასრულების შემდეგ ევროპა უძლური აღმოჩნდა სხვა გამოწვევების წინაშე.

"მაშინ, როდესაც პირველი მსოფლიო ომის შემდეგ საქართველომ მოიპოვა დამოუკიდებლობა, თითქოს ყველაფერი სწორად ვითარდებოდა, მაგრამ შემდეგ იყო საბჭოთა რუსეთის ოკუპაცია, სამოქალაქო ომები და დიდი გაჭირვება. სწორედ ამ გამოწვევებზე, გამოცდილებასა და შედეგებზე ვისაუბრეთ დღეს", - თქვა ავსტრიის ელჩმა, არად ბენკომ.