ქართული ოცნების მიერ მხარდაჭერილმა საპრეზიდენტო კანდიდატმა, სალომე ზურაბიშვილმა სოფელ ატოცში რუსი სამხედროების მიერ მავთულხლართების გაბმას "ქვეყნის სუვერენიტეტის ხელყოფის" მაგალითი უწოდა.

"ეს არის დასაგმობი, და არა მხოლოდ დასაგმობი! ჩვენი მოსახლეობის უსაფრთხოების დასაცავად, აუცილებელია, რომ დავიწყოთ ჩვენს პარტნიორებთან უფრო მჭიდრო თანამშრომლობა საოკუპაციო ხაზის საკითხთან დაკავშირებით", — წერს ზურაბიშვილი და ამომრჩეველს ჰპირდება, რომ მეორე ტურში გამარჯვების შემთხვევაში, ამ მიმართულებით მუშაობას შეუდგება ევროკავშირის მონიტორინგის მისიასთან და ამერიკელ პარტნიორებთან ერთად.

6 ნოემბერს ცნობილი გახდა, რომ ქარელის მუნიციპალიტეტის სოფელ ატოცის მიმდებარე ტერიტორიაზე მავთულხლართების უკანონო გაბმა მიმდინარეობს. სახელმწიფო უსაფრთხოების სამსახურის განცხადებით, აღნიშნულ ფაქტთან დაკავშირებით გააქტიურებულია ცხელი ხაზი და ინფორმირებულია ევროკავშირის სადამკვირვებლო მისია.