საქართველოს საპატრიარქოში შეხვედრის შემდეგ მთავრობამ გადაწყვეტილება მიიღო და კანაფის კონტროლის შესახებ კანონპროექტს პარლამენტიდან გაიწვევს. ამის შესახებ ჟურნალისტებს პატრიარქთან შეხვედრის ერთ-ერთმა მონაწილემ, შინაგან საქმეთა მინისტრმა, გიორგი გახარიამ განუცხადა.

შს მინისტრის თქმით, კანაფის კონტროლის შესახებ კანონპროექტზე ამ ეტაპზე პოლიტიკური კონსენსუსის მიღება შეუძლებელია და ამიტომ მთავრობა აღნიშნულ კანონპროექტს პარლამენტიდან გამოითხოვს.

"ამ კანონპროექტს იურიდიული პოზიციიდან გამოსაწვევი არაფერი სჭირდა, მაგრამ პოლიტიკური და საარჩევნო კონტექსტიდან გამომდინარე, ჩვენი საპატრიარქოსა და მოსახლეობის პოზიციიდან გამომდინარე მთავრობამ შესაბამისი გადაწყვეტილება მიიღო", — განაცხადა გიორგი გახარიამ.

საქართველოს პატრიარქს პარლამენტის თავმჯდომარე ირაკლი კობახიძე და გიორგი გახარია კანაფის კონტროლის კანონპროექტთან დაკავშირებით ერთი საათის განმავლობაში ხვდებოდნენ.

შს მინისტრი გიორგი გახარია და პარლამენტის თავმჯდომარე ირაკლი კობახიძე ადასტურებენ, რომ მარიხუანას კულტივაცია/ექსპორტის შესახებ კანონპროექტზე მსჯელობა გუშინ პარტიის ოფისში გამართულ შეხვედრაზეც შედგა და კანონპროექტის უკან გაწვევა გარკვეულწილად საპრეზიდენტო არჩევნებთანაც არის კავშირში.

"ამ არჩევნებმა გვაჩვენა საზოგადოების განწყობა, რომელსაც განსაკუთრებული პასუხისმგებლობით ვეკიდებით", — განაცხადა ირაკლი კობახიძემ საპატრიარქოში შეხვედრის დასრულების შემდეგ.

მისივე თქმით, პატრიარქთან შეხვედრის დროს ისაუბრეს საკონსტიტუციო სასამართლოს როლზე და მიღებულია პრინციპული გადაწყვეტილება, რომ საკონსტიტუციო სასამართლოს გადაწყვეტილებებს ნარკოპოლიტიკასთან დაკავშირებით ჩარჩოში მოაქცევს.

"შესაძლოა, ვიმსჯელოთ ისეთ ცვლილებებზე, რომელიც ჩარჩოში მოაქცევს საკონტიტუციო სასამართლოს გადაწყვეტილებას იმ სფეროში, რასაც ჰქვია ნარკოტიკების მოხმარება და ზოგადად ნარკოპოლიტიკა. უახლოეს მომავალში დაიწყება მსგავსს კანონპროექტზე მუშაობა, როგორ მოხდება ეს და რა ფორმით არის პრინციპის საქმე და გადაწყვეტილება ამაზეც იქნება მიღებული", — განაცხადა ირაკლი კობახიძემ.

კანაფის კონტროლის შესახებ კანონპროექტი

შინაგან საქმეთა სამინისტროს მიერ შემუშავებული კანონპროექტი "მცენარე კანაფის კონტროლის" შესახებ სამედიცინო მიზნით მარიხუანის დათესვას, მოყვანა და კულტივაციას გულისხმობს. კანონპროექტის მიხედვით, მარიხუანის მხოლოდ ექსპორტი იქნება დაშვებული, ხოლო იმპორტი აკრძალული. ასევე აიკრძალება არასამედიცინო მიზნით კანაფის კულტივაციაც.

დოკუმენტი 131 გვერდიანია და დამტკიცების შემდეგ, სულ მცირე 10 კანონში გამოიწვევდა ცვლილებას. კანონპროექტს როგორც ეკლესიიდან, ისე საზოგადოებისგან კრიტიკა მოჰყვა. საქართველოს საპატრიარქომ განცხადება გაავრცელა, სადაც აღნიშნა, რომ სრულიად მართმადიდებელი ეკლესია და მრევლი ეწინააღმდეგება ნებისმიერი მიზნისთვის მარიხუანის რეალიზაციის ლეგალიზებას.

კანონპროექტის გადავადების გადაწყვეტილება უმრავლესობამ მას შემდეგ მიიღო, რაც აღნიშნულ ინიციატივას საქართველოს მართლმადიდებელი ეკლესია დაუპირისპირდა. პარლამენტში კანონპროექტის უკან გაწვევაზეც მსჯელობდნენ. ორი დღის წინ კი საპარლამენტო უმრავლესობის ნაწილმა, ჯანდაცვის კომიტეტის წევრებმა მთავრობისგან კანონპროექტის უკან გაწვევა მოითხოვეს.