26 ოქტომბრიდან 3 ნოემბრამდე, თბილისში, გლდანის რაიონში, 1991 წელს დამოუკიდებლობის მოპოვების შემდეგ პირველი თბილისის საერთაშორისო არქიტექტურის ბიენალე გაიმართება. ღონისძიება მთლიანად მთავარი თემის გარშემო მხოლოდ შენობები არ კმარა იქნება კონცენტრირებული, რომელიც საცხოვრებელი უბნების არაფორმალურ ურბანულ და სოციალურ სივრცეების კვლევას შეეხება.

თბილისის არქიტექტურის ბიენალეს მიზანია, სიღრმისეულად გაიაზროს პოსტ-საბჭოური ტრანსფორმაციის ეპოქა და გამოიკვლიოს, თუ როგორ მიმდინარეობს ამ ცვლილებების ასახვა ურბანულ გარემოზე, მათ მომხმარებლებზე და როგორ მონაწილეობს საზოგადოება ამ პროცესებში.

თბილისის არქიტექტურის ბიენალე უმასპინძლებს მსოფლიოში წამყვან არქიტექტორებს, მეცნიერებს, ხელოვანებს და მედიის წარმომადგენლებს, რომლებიც იმსჯელებენ და შეეცდებიან ხაზი გაუსვან, არაფორმალური არქიტექტურისა და ურბანული სივრცის მრავალფეროვნებას და განიხალავენ როგორც თეორიულ, ასევე პრაქტიკულ მიდგომებს.

ბიენალე შედგება როგორც შიდა, ასევე ღია სივრცეში გამართული აქტივობებისგან, მათ შორისაა: გამოფენები, სიმპოზიუმი, საჯარო ლექციები, გლდანის ტურები გიდის თანხლებით, ფილმების ჩვენებები, ხელოვანთა პერფორმანსები, ურბანული და არქიტექტურული ინსტალაციები. შეიქმნება საჯარო ხელოვნების ნიმუშები, რომლებიც გლდანის ღია სივრცის ნაწილი გახდება.

"ჩვენი მთავარი მიზანია, მოხდეს თბილისსა და სხვა ქალაქებში არქიტექტურული და ურბანული საკითხებისადმი ცნობიერების ამაღლება და უკვე არსებული კრიტიკული დისკურსის მეტად გამყარება. თაბ 2018 ის ფარგლებში დაგეგმილ აქტივობებში, მოწვეული ქართველი და უცხოელი სტუმრების გარდა, გვინდა, რომ აქტიური მონაწილეობა მიიღონ თბილისის მაცხოვრებლებმა, როგორც ზემოთ აღწერილი პროცესის უშუალო მონაწილეებმა", - თინათინ გურგენიძე, თაბ-ის თანადამფუძნებელი

პროექტის მხარდამჭერები არიან შემოქმედებითი ევროპის ცენტრი, ევროპის კულტურული ცენტრი, თბილისის მერია, აწარმოე საქართველოში, თი ბი სი ბანკი და აჭარა ჯგუფი.

თბილისის არქიტექტურის ბიენალე 2018 წლის 3 ნომბრამდე გაგრძელდება და ყველა ღონისძიებაზე დასწრება ნებისმიერი მსურველისთვის თავისუფალია.

დეტალური პროგრამა იხილეთ ვებგვერდზე.