საქართველოს კომუნიკაციების ეროვნული კომისიის განცხადებით, საზოგადოებრივი მაუწყებელი ვალდებულია წინასაარჩევნო უფასო რეკლამისთვის დრო 2016 წლის 19 აგვისტოდან, არჩევნების დღემდე 50-ე დღიდან, გამოყოს:

"თუმცა, საზოგადოებრივი მაუწყებელს უფლება ჰქონდა უფასო საეთერო დრო საარჩევნო სუბიექტებისთვის აღნიშნულ თარიღამდეც გამოეყო".

კომისია საქართველოს ორგანული კანონის საქართველოს საარჩევნო კოდექსის 50-ე მუხლზე დაყრდნობით აცხადებს, რომ ნებისმიერი მაუწყებელი, მათ შორის, საზოგადოებრივი მაუწყებელი, ვალდებულია შეისწავლოს პოლიტიკური პარტიის მიერ განსათავსებლად წარდგენილი სარეკლამო რგოლის კანონთან შესაბამისობა და შემდგომ განათავსოს წინასაარჩევნო სარეკლამო რგოლი ეთერში:

"წინასაარჩევნო პოლიტიკური რეკლამის შინაარსზე პასუხისმგებელია წინასაარჩევნო რეკლამის დამკვეთი პოლიტიკური სუბიექტი, თუმცა მაუწყებელს უფლება ჰქონდა სადავო შინაარსის მქონე წინასაარჩევნო სარეკლამო რგოლის თაობაზე მიმართოს შესაბამის კომპეტენტურ ორგანოებს, რაც საზოგადოებრივმა მაუწყებელმა პოლიტიკური გაერთიანება ცენტრისტების წინასაარჩევნო სარეკლამო რგოლის ეთერიდან მოხსნის შემდეგ გააკეთა".

საქართველოს კომუნიკაციების ეროვნული კომისია აცხადებს, რომ საზოგადოებრივი მაუწყებლის მიერ მიმდინარე წლის 14 აგვისტოს გაცხადებულ პოლიტიკური გაერთიანება ცენტრისტების საარჩევნო რეკლამაში არსებულ დარღვევაზე რეაგირება ცესკოს უფლებამოსილებას წარმოადგენს.

საზოგადოებრივი მაუწყებელმა რეკლამის მოხსნის მიზეზად ცენტრისტების წინასაარჩევნო რეკლამის შინაარსში სახელმწიფოს სუვერენიტეტის საწინააღმდეგო გზავნილები და მისი საქართველოს კონსტიტუციასთან შეუსაბამობა დაასახელა.

მთავრობა, ოპოზიცია და არასამთავრობოები ცენტრისტების წინააღმდეგ სარჩელს ამზადებენ, პრეზიდენტის ადმინისტრაცია აცხადებს, რომ ცენტრისტების წინასაარჩევნო კამპანია ანტიკონსტიტუციურია.