კატალონიის დამოუკიდებლობის მომხრეებმა არალეგიტიმური რეფერენდუმიდან ერთი წლის თავზე საპროტესტო აქციები გამართეს. მათ ავტონომიური რეგიონის ჩრდილოეთით რკინიგზა გადაკეტეს.

ასობით დემონსტრანტი ლიანდაგზე გაწვა და ბარსელონიდან პარიზის მიმართულებით მიმავალ ჩქაროსნულ მატარებლებს გზა გადაუკეტა. ასევე, გადაკეტეს საავტომობილი მაგისტრალი. რამდენიმე საათის შემდეგ რკინიგზაზე მოძრაობა აღდგა.

გარდა ამისა, აქციის მონაწილეებმა ბარსელონის ცენტრალური ქუჩები გადაკეტეს. ქალაქის ცენტრში კი მიტინგი გაიმართა. პარალელურად ავტონომიური რეგიონის სხვა ქალაქებშიც მიმდინარეობს საპროტესტო აქციები.

კატალონიაში კრიზისი მას შემდეგ დაიწყო, რაც რეგიონში 2017 წლის პირველ ოქტომბერს ცენტრალური ხელისუფლების მიერ აკრძალული დამოუკიდებლობის შესახებ რეფერენდუმი ჩატარდა. სამართალდამცავებთან დაპირისპირების მიუხედავად, რეფერენდუმი გაიმართა და კატალონიელების 90-მა პროცენტმა დამოუკიდებლობას დაუჭირა მხარი.

კატალონიის მთავრობის მაშინდელმა ლიდერმა, კარლეს პუჩდემონმა და რეგიონის სხვა ლიდერებმა დამოუკიდებლობის დეკლარაციას ხელი მოაწერეს, მაგრამ მაშინვე შეაჩერეს მისი მოქმედება, რათა ცენტრალურ ხელისუფლებასთან მოლაპარაკებები დაეწყოთ. ქვეყნების უმრავლესობამ კატალონიის დამოუკიდებლობა არ აღიარა.

ცენტრალური ხელისუფლებიდან პირდაპირი მმართველობის დამყარების შემდეგ კარელს პუჩდემონი და კიდევ ოთხი კატალონიელი პოლიტიკოსი ბელგიაში გაიქცა. ესპანეთის ხელისუფლება მათ და კიდევ რამდენიმე პირს სახელმწიფო გადატრიალებაში სდებს ბრალს. იმავე წლის დეკემბერს რეგიონული არჩევნები გაიმართა. არჩევნებში დამოუკიდებლობის მომხრე პარტიამ გაიმარჯვა.