გარემოს დაცვისა და სოფლის მეურნეობის სამინისტროს განცხადებით, სამედიცინო დანიშნულებისათვის განკუთვნილი კანაფის წარმოების ლიცენზიის ღირებულება ამ ეტაპზე განსაზღვრული არ არის და გავრცელებული ინფორმაცია, რომ ლიცენზიის ღირებულება 25 ათასი ლარია, სიმართლეს არ შესაბამება.

სამინისტროს განმარტებით, კანონპროექტით განსაზღვრული თანხა სალიცენზიო მოსაკრებელია, რაც ლიცენზიაზე განაცხადის გაკეთების წინაპირობაა. აუქციონის მონაწილეებს ეს თანხა უკან არ დაუბრუნდებათ.

სამინისტროს მიერ გავრცელებულ განცხადებაში ნათქვამია, რომ "სრულიად უსაფუძვლოა განცხადებები მონოპოლიური სქემის შექმნასთან დაკავშირებით".

"სამედიცინო დანიშნულების კანაფის მოყვანა, მისი გადაზიდვა და გადამუშავება იქნება ერთმანეთისგან გამიჯნული საქმიანობა. ლიცენზიების რაოდენობა იქნება არანაკლებ 150-ისა, რაც გამორიცხავს ეკონომიკის მონოპოლიზებას", - ვკითხულობთ განცხადებაში.

კანაფის კონტროლის შესახებ კანონპროექტის მიხედვით, რომელიც პარლამენტში უკვე დარეგისტრირდა, სოფლის მეურნეობის სამინისტროს ბაზაზე კანაფის კონტროლის სააგენტო შეიქმნება.

სააგენტო პასუხისმგებელი იქნება კანაფთან დაკავშირებული საქმიანობის სახელმწიფო კონტროლზე, გასცემს ლიცენზიებს და გააკონტროლებს სალიცენზიო პირობების დაცვის საკითხს. სააგენტო ასევე იმუშავებს სამართალდარღვევების პრევენციაზე, მათ გამოვლენასა და რეაგირებაზე.

კანონროექტში აღნიშნულია, რომ სააგენტო ასევე ვალდებული იქნება აწარმოოს საინფორმაციო კამპანია "ნარკომანიის გავრცელების თავიდან აცილების მიზნით" და დაგეგმოს პრევენციული ღონისძიებები.

კანონპოექტში ვკითხულობთ, რომ სააგენტო მოამზადებს დოკუმენტს, რომლის მთავარი თემაც საქართველოში ნარკომანიის გავრცელებაში მცენარე კანაფის/მარიხუანის გავლენა იქნება.