აუტიზმის სპექტრის მქონე ბავშვის მშობელი, ნანა ანთიძე ამბობს, რომ ქუთაისის საერთაშორისო აეროპორტში თვითმფრინავში არ აუშვეს, რადგანაც ფრენამდე მისი შვილი გაღიზიანებული იყო. ისინი საბერძნეთში ცხოვრობენ და სწორედ იქ აპირებდნენ დაბრუნებას.

ბავშვის დედამ On.ge-ს უთხრა, რომ შემთხვევა 23 აგვისტოს გამთენიისას მოხდა. ანთიძის თქმით, ისინი ბორტზე ავიაკომპანია Wizz Air-მა არ აუშვა. ასევე, აეროპორტის ადმინისტრაციის წარმომადგენლებმა რეგისტრაციის უფლება არ მისცეს, როდესაც დაინახეს, რომ ბავშვი გაღიზიანებული იყო.

როგორც დედა ყვება, მისი შვილი გაღიზიანებული გაფრენამდე იყო. მისივე თქმით, რეგისტრაციის დასრულებამდე და ფრენამდე ორი საათით ადრე ბავშვი უკვე დამშვიდებული იყო, რაც ექიმებმა წერილობითაც დაუდასტურეს, თუმცა ისინი თვითმფრინავში მაინც არ აუშვეს.

ანთიძე ყვება, რომ ბილეთი 9 სექტემბრისთვის ჰქონდა ნაყიდი, თუმცა საქართველოში ბავშვის მდგომარეობა გართულდა და ამიტომაც დროზე ადრე გაფრენა გადაწყვიტა.

"ერთი კვირის წინ, ჩავედი ქუთაისის აეროპორტში და ვთხოვე, რომ ბავშვის მდგომარეობა რთულია, გადამაცვლევინეთ ბილეთი უახლოეს რეისზე. გადარეკეს სათაო ოფისში უნგრეთში, რადგანაც აქ წარმომადგენლობა არ ჰყავთ, გადავიხადე 1 600 ლარი და გადავცვალე ბილეთი და იცოდნენ ჩემი მდგომარეობა", - ამბობს ანთიძე On.ge-სთან.

მისი თქმით, ფრენამდე, როდესაც ბავშვი უკვე დამშვიდებული იყო, მისი მდგომარეობის სანახავად არავინ მისულა, არც ექიმის წერილობითი დასტური უნახავს ვინმეს:

"თვითონ ექიმი დავალაპარაკე პილოტს, რომ ბავშვი დაწყნარებულია და მოდით, ნახეთ. არავინ არ გამომეხმაურა. მომხსნეს რეისიდან და პასუხიც ვერ მივიღე... ბავშვი დამეღუპება ამ ვითარებაში, იქ ჰყავს პირადი ექიმი, იქ ვცხოვრობთ, ახლა ეწყებათ სკოლა და სპეციალური კურსები".

ნანა ანთიძე ახლა ითხოვს, რომ მასსა და მის შვილს უახლოესი რეისით 26 აგვისტოს გაფრენის საშუალება მისცენ, თუმცა ამისთვის დამატებითი თანხის გადახდა მოსთხოვეს. დახმარებისთვის მან სახალხო დამცველს ელექტრონული ფოსტით უკვე მიმართა.

საქართველოს აეროპორტების გაერთიანება მომხდარ ფაქტს ადასტურებს. მათი განმარტებით, ბავშვის შეტევას შეესწრო ხომალდის მეთაური და ბორტზე მის ასაყვანად შესაბამისი სამედიცინო დასკვნა მოითხოვა:

"მგზავრის სამედიცინო შემოწმება ადგილზე გაჭირდა, რადგან აუტისტური სპექტრის აშლილობა ექიმის კაბინეტშიც გაგრძელდა. მას თან ახლდა დედა და 8 წლის და, რომელთან ერთადაც მიფრინავდა ათენში. მშობელმა და გამცილებლებმა ვერ შეძლეს მისი დამშვიდება".

როგორც აეროპორტების გაერთიანება აცხადებს, ეკიპაჟის მეთაურმა მოითხოვა შესაბამისი სამედიცინო ცნობა ინგლისურ ენაზე, რომ ბავშვისთვის ფრენა საშიში არ არის და არც სხვა მგზავრებს შეუქმნიდა ფრენისას დისკომფორტს.

"ბუნებრივია, აეროპორტის ექიმის კომპეტენცია მსგავსი ცნობის გაცემისგან მოკლებულია. თავად ბავშვის მშობელს კი ბავშვის ჯანმრთელობის შესახებ ცნობა არ გააჩნდა. შესაბამისად, ავიაკომპანიის ხომალდის მეთაურმა ბორტზე მგზავრის დაშვებისგან თავი შეიკავა", - ნათქვამია განცხადებაში.

როგორც აეროპორტების გაერთიანებაში On.ge-ს განუმარტეს, იმისათვის რომ ნანა ანთიძემ გაფრენა შეძლოს ბავშვის ჯანმრთელობის შესახებ ცნობა ინგლისურ ენაზე უნდა წარადგინოს, რადგან ეკიპაჟის მეთაურმა ინგლისური იცის და საბოლოო გადაწყვეტილება მასზეა.