პანამური იურიდიული კომპანიის მოსაკ ფონსეკას დოკუმენტების გაჟონვის შემდეგ სხვა პოლიტიკოსებთან ერთად ყურადღების ქვეშ მოექცა ჩინეთის კომუნისტური პარტიის ელიტაც.

ჩინეთის პრეზიდენტის, სი ძინპინის ოჯახის წევრებმა, მისმა სიძემ და ჩინეთის პოლიტბიუროს 8 წევრმა მოსაკ ფონსეკას დახმარებით ოფშორში რამდენიმე კომპანია დაარეგისტრირეს.

საგამოძიებო ჟურნალისტების საერთაშორისო კონსორციუმის (ICIJ) ცნობით, დენ ჯინგუიმ, პრეზიდენტის სიძემ 2009 წელს ბრიტანეთის ვირჯინიის კუნძულებზე ორი კომპანია დაარეგისტრირა. გარდა ამ კომპანიებისა, პანამის დოკუმენტებში საუბარია ჩინეთის ყოფილი პრემიერის, ლი პენის ქალიშვილის, ლი სიოლინისა და შვილიშვილის ჯია ქინლინის ქონებაზეც.

აღნიშნული ინფორმაციის ბლოკირებას ჩინეთში აქტიურად ცდილობენ, სახელმწიფოს კონტროლის ქვეშ მყოფი პრესა დუმს, გავრცელდა ცნობები, რომ შედარებით დამოუკიდებელი ინტერნეტ გამოცემები გათიშეს, ხოლო ჩინურ სოციალურ ქსელებში Sina Weibo-სა და Wechat-ში პანამის დოკუმენტების თემაზე გამოქვეყნებული პოსტები აქტიურად იშლება.

BBC-ს ცნობით სოციალურ ქსელებში 481 დისკუსია წაშალა, რომელიც პანამის დოკუმენტების თემაზე მიმდინარეობდა.

მსოფლიოს 400-მდე ჟურნალისტისთვის ხელმისაწვდომი გახდა იურიდიული ფირმა მოსაკ ფონსეკას საიდუმლო დოკუმენტები. 11 მილიონ საბუთში ცხადად ჩანს, თუ როგორ იყენებდნენ მსოფლიოს ცნობილი პოლიტიკოსები და ბიზნესმენები ე.წ. საგადასახადო სამოთხეებს (ოფშორულ ზონებს) ფულის გასათეთრებლად და გადასახადებისგან თავის ასარიდებლად.