საკონსტიტუციო სასამართლო მარიხუანის მოხმარების ლეგალიზაციის მიმართ გაკეთებულ განცხადებებს გამოეხმაურა. 30 ივლისის გადაწყვეტილებით, ადმინისტრაციული პასუხისმგებლობა გაუქმდა მარიხუანის მოხმარებისთვის, თუ მოხმარების კონკრეტული ფაქტი არ უქმნის საფრთხეებს მესამე პირებს.

საკონსტიტუციოს გადაწყვეტილებას არ დაეთანხმა მართლმადიდებელი ეკლესიის საპატრიარქო და ქართული ოცნების ზოგიერთი წევრი. ზოგიერთი სასულიერო პირი საკონსტიტუციო სასამართლოს გაუქმებასაც ითხოვდა.

საკონსტიტუციოს განცხადებაში ნათქვამია, რომ მედიასაშუალებების, პოლიტიკური და რელიგიური ორგანიზაციების მიერ გაკეთებული განცხადებები მოკლებულია საფუძველს.

განცხადებაში აღნიშნულია, რომ საკონსტიტუციო სასამართლოს საქმიანობის ამოსავალი წერტილი კონსტიტუციური უფლებების დაცვაა და "იგი ვერ დაუშვებს უფლებების დარღვევას საზოგადოებრივი პროტესტის თავიდან ასაცილებლად".

მათივე თქმით, "უსაფუძვლო განცხადებები" საკონსტიტუციო სასამართლოს წარმოაჩენს პოლიტიკური პროცესის მონაწილე მხარედ, ამცირებს მისდამი ნდობას, ეჭვქვეშ აყენებს მის დამოუკიდებლობას და იწვევს მისი თითოეული წევრის დისკრედიტაციას.

სასამართლო განმარტებით, მედიასაშუალებების, პოლიტიკური და რელიგიური ორგანიზაციების წარმომადგენელთა მიერ გავრცელებულ განცხადებები არ შეიცავს არცერთ საფუძვლიან ფაქტობრივ გარემოებას და არასწორი დასკვნებით, ზიანს აყენებს საკონსტიტუციო სასამართლოს ავტორიტეტს.

"2018 წლის 30 ივლისის გადაწყვეტილება წარმოადგენს საკონსტიტუციო სასამართლოს მიერ ბოლო წლებში ნარკოტიკული საშუალება - მარიხუანის საკითხზე მიღებულ გადაწყვეტილებებში მოცემული არგუმენტაციის ლოგიკურ გაგრძელებას და გაუგებარია, თუ რატომ გახდა იგი საკონსტიტუციო სასამართლოს მიმართ დაუსაბუთებელი კრიტიკის მიზეზი".