საქართველოს პრემიერის, მამუკა ბახტაძის თქმით, რუსეთს საქართველოს ტერიტორიის ოკუპაცია 2008 წელს არ დაუწყია და ეს პროცესი ბევრად უფრო ადრე, დამოუკიდებლობის მოპოვების დროს დაიწყო. ამის შესახებ პრემიერმა მთავრობის სხდომის დაწყებამდე გამართულ ბრიფინგზე ისაუბრა.

"ბევრი ევროპელი პოლიტიკოსი, მათ შორის ჩვენი ამერიკელი მეგობრები აცხადებენ, რომ ჩვენი მეგობარი ქვეყნები მაშინ აფრთხილებდნენ მაშინდელ პოლიტიკურ ხელმძღვანელობას, რომ რუსეთი გეგმავდა საომარი ოპერაციების სცენარის განხორციელებას. სამწუხაროდ, მაშინდელმა ხელმძღვანელობამ იმის მაგივრად, რომ თავიდან აერიდებინა მსგავსი მოვლენების განვითარება და დაეწყო ჩვენი მეგობარი ქვეყნების ჩართულობით პრევენციაზე ორიენტირება, ვერ შეუშალა ხელი რუსეთის მიერ დაგეგმილი სცენარის განხორციელებას საქართველოში. მათ ვერ აარიდეს ქვეყანას საფრთხე და მთელი ქვეყანა აღმოჩნდა კატასტროფულ სიტუაციაში", - თქვა ბახტაძემ.

პრემიერმა რუსეთის ხელისუფლებას მოუწოდა გაიყვანოს საქართველოს ოკუპირებული ტერიტორიებიდან ჯარი და შეასრულოს 2008 წელს მიღწეული შეთანხმება.