300 ადამიანი სასწაულებრივად გადაურჩა სიკვდილს 3 აგვისტოს დუბაის საერთაშორისო აეროპორტში. ემირატების ავიახაზების ბოინგ 777–ს, რომელიც ინდოეთიდან ჩაფრინდა დუბაიში, ავარიულად დაშვებისას ცეცხლი გაუჩნდა. ემირატების ავიახაზების პილოტებმა და ბორტგამცილებლებმა 90 წამში შეძლეს თვითმფრინავში მყოფი 300 ადამიანის ევაკუაცია, რამდენიმე წუთში კი ხანძარმა თვითმფრინავი თითქმის მთლიანად გაანადგურა. ოფიციალური ინფორმაციით, მგზავრთა გადარჩენის ოპერაციას ემსხვერპლა დუბაის აეროპორტის სახანძრო სამსახურის თანამშრომელი. მსუბუქად დაშავდა 13 მგზავრი.

ავიაკატასტროფის თვითმხილველი დუბაის აეროპორტში არაერთი ადამიანი გახდა. ერთ–ერთმა თვითმხილველმა ტვიტერზე გამოაქვეყნა ვიდეო, სადაც ჩანს, რომ თვითმფრინავი დაშვებისას და ევაკუაციის დაწყებამდე, უკვე კვამლში იყო გახვეული.

ერთ–ერთმა მგზავრმა ასევე გადაიღო ვიდეო ცეცხლმოდებული თვითმფრინავის შიგნით, ევაკუაციის დროს.

ჯერჯერობით უცნობია, კონკრეტულად თუ რამ გამოიწვია ავიაკატასტროფა. ერთადერთი, რაც ამ დროისთვისაა ცნობილი, დასაფრენ ბილიკთან შეხების დროს შასები გახსნილი არ იყო.

ემირატების ავიახაზები მსოფლიოში ერთ–ერთ ყველაზე უსაფრთხო, მაღალი კლასის ავიაკომპანიად მიიჩნევა.

ერთ–ერთი მიზეზი, რატომაც ევაკუაცია უმსხვერპლოდ დასრულდა, თანამედროვე ტექნოლოგიებია. კერძოდ, 1990–იანი წლების შემდეგ, თვითმფრინავის შიდა სალონი ისეთი მასალისგან მზადდება, რომელიც ძნელად იწვის, ხოლო წვის შემთხვევაში, ტოქსიკურ ნივთიერებას მცირე რაოდენობით გამოყოფს. გარდა ამისა, სავარძლები სალონის იატაკზე ისე მყარადაა მიმაგრებული, რომ ძლიერი დარტყმის დროსაც კი რთულია მისი ამოვარდნა. ერთ–ერთი მნიშვნელოვანი ფაქტორია ევაკუაციის მოქნილი გეგმა. თანამედროვე სტანდარტებით, ევაკუაცია მაქსიმუმ 90 წამში უნდა მოესწროს, რათა მსხვერპლი და ადამიანთა დაზიანება მაქსიმალურად იქნეს თავიდან აცილებული. სწრაფ ევაკუაციას ასევე უზრუნველყოფს თანამედროვე თვითმფრინავების რამდენიმე საავარიო გასასვლელი.