სსიპ დანაშაულის პრევენციის ცენტრი აცხადებდა, რომ მისი ყოფილი თანამშრომლის, თამაზ ახობაძის საქმეში არ მონაწილეობს, რალურად კი მოპასუხე მხარეა. საქმე ეხება ახობაძის თანამდებობაზე აღდგენის შესახებ უზენაეს სასამართლოში მიღებულ გადაწყვეტილებას.

"ამ დავაში არც დანაშაულის პრევენციის ცენტრი და არც იუსტიციის სამინისტრო არ მონაწილეობს. ეს არის კერძო დავა, რომელსაც აწარმოებს დანაშაულის პრევენციის ცენტრის თანამშრომელი ბორის ბარამია თამაზ ახობაძის წინააღმდეგ, რადგან ის მუშაობს იმ ადგილას, სადაც ახობაძე ითხოვს აღდგენას. ობიექტურად სწორი გვგონია, რომ ბარამიას უფლებაა მონაწილეობდეს სასამართლო პროცესში, რომელიც მის სამუშაო ადგილს ეხება. რამდენადაც ჩვენთვის ცნობილია ამჯერად ეს საკითხი განიხილებოდა", - განუცხადეს On.ge-ს ახობაძის საქმესთან დაკავშირებით 23 ივლისს დანაშაულის პრევენციის ცენტრში.

ფოტო: თამაზ ახობაძე

უზენაესი სასამართლოს განჩინების გასაჯაროების შემდეგ On.ge დანაშაულის პრევენციის ცენტრს 24 ივლისს დაუკავშირდა და ჰკითხა, რატომ აღნიშნეს მანამდე, რომ დავაში არ მონაწილეობდნენ, როცა მოპასუხე მხარედ არიან მოხსენიებული.

"რაც შეეხება იმ ფაქტს, რომ სსიპ დანაშაულის პრევენციის ცენტრი მითითებულია განჩინებაში, ეს ცხადია. რაკი განჩინება გამოტანილია საქმეზე, სადაც მოპასუხე ყველა წინა სასამართლო ეტაპზე იყო სსიპ დანაშაულის პრევენციის ცენტრი, განჩინებაში ეს ფაქტი ასეც იქნებოდა მითითებული", - განუცხადეს უწყებაში 25 ივლისს, თუმცა დამატებითი განმარტებებისგან თავი შეიკავეს.

ახობაძის საქმე

2014 წელს ანა სუბელიანი და თამაზ ახობაძე დანაშაულის პრევენციის ცენტრიდან გაათავისუფლეს. ისინი გათავისუფლებას მინისტრის, თეა წულუკიანის პირად გადაწყვეტილებას უკავშირებდნენ, რადგან მათ ფეისბუკზე გააპროტესტეს დანაშაულის პრევენციის ცენტრის, დავით მაისურაძის, გათავისუფლება. სუბელიანმა და ახობაძემ სსიპ-ს, დანაშაულის პრევენციის ცენტრს, სააპელაციო სასამართლოში დავა 2017 წლის 9 მარტს მოუგეს.

დანაშაულის პრევენციის ცენტრმა აღნიშნული გადაწყვეტილება გაასაჩივრა უზენაეს სასამართლოში, თუმცა, უმაღლესმა ინსტანციამ 2017 წლის 18 სექტემბერს დაუშვებლად სცნო საკასაციო საჩივარი და ძალაში დატოვა სააპელაციო სასამართლოს გადაწყვეტილება, რითაც უწყებას მათი სამსახურში აღდგენა და თითქმის 4-წლიანი იძულებითი განაცდურის ანაზღაურება დაეკისრა.

მოგვიანებით, ცნობილი გახდა, რომ გადაწყვეტილება, რომლითაც ახობაძის თანამდებობაზე აღდგენას შეეხებოდა მის სამუშაო ადგილზე დანიშნულმა პირმა გაასაჩივრა და სააპელაციო სასამართლომ დააკმაყოფილა კიდეც.