ჯანდაცვის მსოფლიო ორგანიზაციამ (WHO) 2016 წლის კვლევაში ჰაერის დაბინძურების შესახებ შეცდომა დაუშვა. 2018 წლის კვლევაში კი დაშვებული შეცდომა გამოასწორა. ამის შესახებ ინფორმაცია ტაბულამ გაავრცელა.

გამოცემა წერს, რომ WHO-მ მეთოდოლოგიური შეცდომა დაუშვა, რომლის შესწორების შემდეგაც საქართველომ ჰაერის დაბინძურებით გამოწვეული სიკვდილიანობით პირველიდან 70- ე ადგილზე გადაინაცვლა.

ორგანიზაციის მიერ 2016 წელს გამოქვეყნებული ანგარიშის მიხედვით, საქართველოს ჰაერი იმდენად მომაკვდინებელი იყო, რომ მთელი პლანეტის მასშტაბით ყველაზე მეტ დაავადებასა და სიკვდილიანობას იწვევდა. ორგანიზაციის წინა შეფასებით, 100 000 კაცზე გაანგარიშების შემთხვევაში, ქართული ჰაერი ყოველწლიურად 292 ადამიანს კლავდა, რაც გლობალურ საშუალოს რამდენჯერმე აღემატებოდა.

"WHO-მ 2016 წელს გამოქვეყნებულ ანგარიშში, დაუშვა შეცდომა, როდესაც მიუთითა, რომ საქართველოში სუფთა საწვავზე ხელმისაწვდომობა 55% იყო, ხოლო მოსახლეობის 45% კი გასათბობად ბინძურ საწვავს (შეშას) იყენებდა. WHO-მ იხელმძღვანელა 2005 წელს მომზადებული ანგარიშით, რომელიც იმ პერიოდში საქართველოს შეშაზე დამოკიდებულებას ასახავდა. 2005 წელს არსებული მონაცემები კი დღეს სრულიად არარელევანტურია, რადგანაც ქვეყანამ გასული 12 წლის განმავლობაში გაზიფიცირებისთვის მილიონობით ლარი დახარჯა", - წერს ტაბულა.

გამოცემის ცნობით, WHO-ს მიერ გამოქვეყნებული მონაცემები, აშკარად მცდარი იყო, რადგანაც ქვეყანაში, სადაც არც წარმოება და არც ქიმიური ინდუსტრია არ არის განვითარებული თითქმის შეუძლებელია ჰაერის დაბინძურებამ ასეთ მასშტაბებს მიაღწიოს.