სახელმწიფო უსაფრთხოების სამსახურის თანამშრომლებმა თეთრიწყაროს მერიის ზედამხედველობის სამსახურის უფროსი და სპეციალისტი სამსახურებრივი გულგრილობის ბრალდებით სისხლის სამართლის პასუხისგებაში მისცა. მათთან ერთად პასუხისგებაში მისცეს თეთრიწყაროს ტენდერში 2016 წელს გამარჯვებული კომპანია ფუძის ორი და ქვეკონტრაქტორი კომპანიის ერთი თანამშრომელი.

"[კომპანიის თანამშრომლებმა] წინასწარი შეთანხმებით, თანხების თაღლითურად მითვისების მიზნით, ფარული სამუშაოების აქტებში და ფორმა N2-ებში შეიტანეს ყალბი მონაცემები, რის საფუძველზეც თაღლითურად დაეუფლნენ სახელმწიფო ბიუჯეტის კუთვნილ თანხებს", - აცხადებენ სუს-ში და დასძენენ, რომ სახელმწიფოსთვის მიყენებული ზარალი 114 814 ლარია.

გამოძიება წინასწარი შეთანხმებით ჯგუფის მიერ დიდი ოდენობით თაღლითობის და სამსახურებრივი გულგრილობის საქმეზე საქართველოს სისხლის სამართლის კოდექსის 180-ე მუხლის მე-2 ნაწილის "ა" ქვეპუნქტით, 180-ე მუხლის მე-3 ნაწილის "ბ" ქვეპუნქტითა და 342-ე მუხლის პირველი ნაწილით მიმდინარეობს. ამ მუხლებით ჩადენილი დანაშაული ექვსიდან ცხრა წლამდე ვადით თავისუფლების აღკვეთას ითვალისწინებს.