სააგენტო პრაიმტაიმი წერილს აქვეყნებს, რომლის თანახმადაც საკონსტიტუციო სასამართლოს 5 მოსამართლე სასამართლოს თავჯდომარეს, გიორგი პაპუაშვილს მიმართავს და განმარტავს, რომ ის ე.წ. პოლიტიკურ საქმეებს პრიორიტეტს ანიჭებს, რომლებიც შესაბამისად ფორსირებულ რეჟიმში განიხილება, რიგითი საქმეები კი გაურკვეველი დროით გადაიდება ხოლმე. ასეთ საქმეებად მოსამართლეები ასეხელებენ გიგი უგულავას, რუსთავი 2-ის, ე.წ. კაბელებისა და სხვა ე.წ. პოლიტიკურ საქმეებს.

On.ge დაუკავშირდა წერილის ერთ-ერთ ავტორს, მოსამართლე მერაბ ტურავას, რომელმაც დაგვიდასტურა, რომ აღნიშნულ დოკუმენტს მართლაც აწერს ხელს.

აღნიშნული 5 მოსამართლის თქმით, დაუშვებელია საკონსტიტუციო სასამართლოს თავმჯდომარის მხრიდან საკონსტიტუციო სასამართლოს დღის წესრიგის ერთპიროვნულად, სასამართლოს სხვა წევრების აზრის გათვალისწინების გარეშე, იმგვარად განსაზღვრა, რომ მოხდეს გარკვეული საქმეების გადაწყვეტის ფორსირება, განსაკუთრებით იმ საქმეებზე, რომლებიც არის პოლიტიკური კონტექსტის შემცველი:

"ჩვენთვის გაურკვეველი მიზეზით, მათზე წინსწრებით ხდება თქვენი მხრიდან რიგი საქმეების გამორჩევა და მათი დაჩქარებული განხილვის რეჟიმში გადაყვანა. მით უფრო იმ პირობებში, როდესაც საკონსტიტუციო სასამართლოს გადასაწყვეტი აქვს არაერთი საქმე, რომლის განხილვაც გაცილებით ადრეა დაწყებული, ხოლო ზოგიერთ მათგანთან დაკავშირებით მოსამართლეებისათვის გადაწყვეტილების პროექტებიც კი არის დარიგებული".

წერილში მოსამართლეები აკონკრეტებენ იმ საქმეებს, რომელთაც ფორსირებული წესით განხილვა ხდება: რუსთავი 2-ის სარჩელი, ტელეკომპანია საქართველოს სარჩელი, გიგი უგულავას საქმის სარჩელი, ე.წ. კაბელების საქმეში ბრალდებულების საქმეების სარჩელები:

"ყოველივე ზემო აღნიშნულიდან გამომდინარე, იკვეთება ტენდენცია, რომ ე.წ. პოლიტიკური ნიშნის შემცველ მითითებულ საქმეებზე როგორც მოხდა მათი უპროცენტოდ სწრაფი განხილვა, ასევე მაღალი ალბათობით მოსალოდნელია მათზე გადაწყვეტილების მიღების, საკონსტიტუციო სასამართლოს პრაქტიკისგან განსხვავებულ, დაჩქარებულ რეჟიმში მოქცევა, რაც დაუშვებლად მიგვაჩნია".

მოსამართლეები (ზაზა თავაძე, ლალი ფაფიაშვილი, თამაზ ცაბუტაშვილი, ოთარ სიჭინავა, მერაბ ტურავა) პაპუაშვილს შემდეგს სთხოვენ:

• საქმეების განხილვა/გადაწყვეტის პროცესი მაქსიმალურად მიახლოებული იყოს იყოს რიგითობის და თანმიმდევრობის პრინციპთან.
• უზრუნველყოფილ იქნეს მოსამართლეებისათვის ნორმალური სამუშაო ვითარების შექმნა, ჩვენი აზრის გაუთვალისწინებლად, ერთპიროვნულად და ფორსირებულად არ ხდებოდეს საკონსტიტუციო სასამართლოს საქმეთა განხილვის განრიგის მართვა/შედგენა.
• მსგავსად კოლეგიისა, რომელსაც ამ საქმეებზე დასჭირდა რამდენიმეთვიანი ვადა, პლენუმს მიეცეს მსგავსი გონივრული(არანაკლებ იმ დროისა, რაც სწორედ ამ საქმეებზე ჰქონდა კოლეგიას) ვადა საქმეების შესწავლისა და გაანალიზებული გადაწყვეტისათვის და ხელოვნურად არ მოხდეს მისი შეზღუდვა დროში, გადაწყვეტილებების მიღების დაჩქარების კუთხით.
• საკონსტიტუციო სასამართლოს თავმჯდომარის 21 ივლისის განცხადების შემდეგ(რომელშიც მან ისაუბრა მოსამართლეებზე ზეწოლის ფაქტების ირგვლივ) საჭიროდ მიგვაჩნია ე.წ. პოლიტიკური ნიშნის მატარებელ ყველა საქმეზე საკონსტიტუციო სასამართლო დაელოდოს შესაბამისი ორგანოების მხრიდან ამ საკითხის სრულყოფილად შესწავლას და ამ საქმეების გადაწყვეტა მხოლოდ მას შემდეგ, როცა გადამოწმდება და დასრულდება სათანადო ორგანოების მხრიდან სასამართლოს თავმჯდომარის განცხადებაში მოყვანილი ზეწოლის ფაქტების სინამდვილე, რათა გამორიცხულ იქნეს ყოველგვარი ეჭვები მოსამართლეების მიუკერძოებლობასა და ობიექტურობასთან დაკავშირებით.