ნასას რობოტი Opportunity მარსზე ქვიშის შტორმში მოჰყვა, რაც გასაკვირი არ არის, თუ გავიხსენებთ, რომ მარსზე ქვიშის ქარიშხლები ზოგჯერ ნახევარ ან მთლიან პლანეტას ფარავს ხოლმე და ის ხანდახან თვეობით გრძელდება. ქვიშის ქარიშხლები ზოგჯერ იმდენად ძლიერია, რომ მზის სხივები მარსის ზედაპირამდე ვეღარ აღწევენ. Opportunity-ისათვის ენერგიის ერთადერთი წყარო მზის პანელების საშუალებით ელემენტების დატენვაა, ამიტომ ამ ტიპის რობოტისთვის ქარიშხალი შეიძლება საბედისწეროც აღმოჩნდეს.

კარგი ამბავი ის არის, რომ Opportunity მამაცი და გამძლე რობოტი გამოდგა, ის 2004 წელს მარსის ზედაპირზე სამთვიანი მისიით დაეშვა, ახლა კი უკვე მე-14 წელი გადის, რაც მარსზე დაგორავს. 2007 წელს რობოტს მსგავსი ქვიშის ქარიშხალი ერთხელ უკვე გამოვლილი აქვს, ამიტომ ინჟინრებმა იციან, რას უნდა ელოდონ.

ცუდი ამბავი კი ის არის, რომ წლევანდელი შტორმი 2007 წლის ქარიშხალზე ბევრად უფრო ძლიერია. ეს შტორმი ინჟინრებისათვის სიურპრიზი იყო, ის ერთ დღეში, 3 ივნისს, ზუსტად რობოტის თავზე წარმოიშვა, მას მერე კი უფრო და უფრო გაძლიერდა. დღის განმავლობაში მარსის ზედაპირზე სრული სიბნელეა.

Opportunity-ს თვალით დანახული მარსის ცა.

Opportunity-ს თვალით დანახული მარსის ცა.

სიმულაცია

ფოტო: NASA/JPL-Caltech/TAMU

ასეთი დაბალი ენერგიის პირობებში, ინჟინრები რობოტის ყველა სამეცნიერო ფუნქციას თიშავენ და ის ძილის რეჟიმში გადაჰყავთ, ამ დროს რობოტი მხოლოდ გამათბობლებს ამუშავებს, რათა არ გაიყინოს და მხოლოდ საკმარისი ენერგიის დაგროვების შემთხვევაში იღვიძებს და დედამიწაზე სიგნალს აგზავნის, რათა გაგვაგებინოს, რომ კარგად არის.

ბოლო სიგნალი Opportunity-სგან ინჟინრებმა 10 ივნისს მიიღეს, მას შემდეგ მეცნიერები სისტემატურად ცდილობენ რობოტისგან სიგნალის დაჭერას, თუმცა ჯერჯერობით არაფერი ისმის.

ინჟინრები წარსულ გამოცდილებაზე და ინფორმაციაზე დაყრდნობით ვარაუდობენ, რომ Opportunity მაინც შეძლებს მოაგროვოს იმდენი ენერგია, რამდენიც რობოტის გადასარჩენად არის საჭირო, ამიტომ ისინი ოპტიმისტურად არიან განწყობილი და თავიანთი საყვარელი რობოტისგან ახალ ამბებს იმედიანად ელიან.