აფხაზეთის ავტონომიური რესპუბლიკის უმაღლესი საბჭოს პრეზიდიუმმა საქართველოს განათლებისა და მეცნიერების მინისტრის მოადგილე გიორგი ჯინჭარაძე აფხაზეთის მთავრობის თავმჯდომარის თანამდებობაზე წარადგინა. ინფორმაცია "ინტერპრესნიუსთან" აფხაზეთის უმაღლესი საბჭოს თავმჯდომარემ, ჯემალ გამახარიამ დაადასტურა.

IPN-ის ცნობით, ჯინჭარაძის დანიშვნის თანხმობის მისაღებად, საქართველოს მთავრობას უკვე მიმართეს.

"გიორგი ჯინჭარაძე — საქართველოს განათლებისა და მეცნიერების მინისტრის მოადგილე, რომელსაც მანამდე ჩვენს სტრუქტურებში რამდენიმე წლის განმავლობაში უმუშავია, წარდგენილია მთავრობის თავმჯდომარეობის კანდიდატად. ამას საქართველოს მთავრობასთან შეთანხმება სჭირდება. დღეს მივიღეთ გადაწყვეტილება და მივმართეთ საქართველოს მთავრობას, რომ მოგვცეს თანხმობა მის დანიშვნაზე. თანხმობის შემდეგ, გიორგი ჯინჭარაძე წარმოადგენს პროგრამას, მთავრობის ახალ შემადგენლობას, შემდეგ ჩვეულებრივი პროცესია — განხილვები კომიტეტებში და ბოლოს, პლენარული სხდომა, სადაც მთავრობა დამტკიცდება. პლენარული სხდომა 10 დღის განმავლობაში უნდა გაიმართოს", — ამბობს ჯემალ გამახარია.

2024 წლის 18 სექტემბრიდან 2025 წლის 2 ივნისამდე აფხაზეთის მთავრობის თავმჯდომარე ლევან მგალობლიშვილი იყო.