მიუხედავად იმისა, რომ Ginny & Georgia-ს მესამე სეზონი ახლახან გამოვიდა, Netflix-მა სერიალის მე-4 სეზონის გადაღების დაწყებაც დაადასტურა, რაც იმას ნიშნავს, რომ ჩვენი საყვარელი დედა-შვილის ცეცხლოვანი თავგადასავლებით აღსავსე სერიებით ისევ გავნებივრდებით.

ვინაიდან სერიალის მესამე სეზონი ეკრანებზე სულ ახლახან გამოვიდა, გასაკვირი არ არის, რომ ჯერ არ არსებობს მეოთხე სეზონის ოფიციალური სინოფსისი, თუმცა ეს მსახიობებსა და შოუს შემქმნელებს ხელს არ უშლის, რომ ერთგულ მაყურებელს მიანიშნონ, რა ელით მომავალში მათ საყვარელ პერსონაჟებს.

ბრიან ჰოუვიმ (ჯორჯიას როლის შემსრულებელმა) გამოცემა StyleCaster-ს განუცხადა, რომ მაყურებლები უნდა ელოდონ მეტ გულისტკენასა და სინანულს, მესამე სეზონის მოულოდნელი მოვლენების შემდეგ — მათ შორის ჯორჯიას ბავშვის მამის ვინაობისა და ჯორჯიასა და ჯოს ურთიერთობის ბუნდოვანი მდგომარეობის შესახებ.

ფოტო: Netflix

თუმცა, სერიალის ცენტრში ყოველთვის იქნება ჯორჯიასა და ჯინის კომპლექსური ურთიერთობა. "ჯორჯია და ჯინი თითქოს მუდმივად კონტრასტში არიან — და სწორედ ამაშია სცენარისტების ძალა", — უთხრა ჰოუვიმ გამოცემას. "ყოველ სეზონთან ერთად ფსონები სულ უფრო იზრდება. დარწმუნებული ვარ, რომ მეოთხე სეზონში ფსონები ყველაზე მაღალი იქნება."

შოუს შემქმნელმა სარა ლამპერტმაც დაადასტურა, რომ მომდევნო სეზონის მთავარი თემა იქნება "ციკლები და წარმოშობა" — ამის შესახებ მან ინტერვიუში Tudum-ს განუცხადა. შესაძლოა, ეს იმას ნიშნავს, რომ უფრო მეტს გავიგებთ ჯორჯიას ფესვებისა და წარსულის შესახებ.

მეოთხე სეზონის გამოსვლის ზუსტი თარიღი ჯერჯერობით უცნობია, მაგრამ იმედი არსებობს, რომ გულშემატკივრებს დიდხანს ლოდინი არ მოუწევთ. 2025 წლის თებერვალში Ginny & Georgia-ს ოფიციალური ინსტაგრამიდან გავიგეთ, რომ სცენარისტთა გუნდმა მეოთხე სეზონის გეგმაზე მუშაობა ჯერ კიდევ მაშინ დაიწყო, როცა მესამე სეზონიც არ იყო გამოშვებული.