აშშ-მ სომხეთის ქალაქ მეწამორის ატომური ელექტროსადგურისთვის 3.4 მილიონი დოლარის ღირებულების სიმულატორი შეუკვეთა, რომლის მიზანიც "უსაფრთხო ოპერაციების გაუმჯობესებაა".

აშშ-ის ელჩმა კრისტინა კვიენმა სიმულატორი სამშაბათს ოფიციალურად გახსნა.

მას თან ახლდნენ აშშ-ის ენერგეტიკის დეპარტამენტის ბირთვული ენერგიის ოფისში საერთაშორისო თანამშრომლობის საკითხებში მდივნის თანაშემწის მოადგილე ალეშია დუნკანი და სომხეთში ევროკავშირის დელეგაციის ხელმძღვანელის მოადგილე იან პლეშინგერი.

"აშშ-ის ენერგეტიკის დეპარტამენტის პარტნიორობა [მეწამორის] ბირთვულ ელექტროსადგურთან წარმოადგენს უახლესი ამერიკული ტექნოლოგიების დემონსტრირებას და კიდევ ერთ მნიშვნელოვან ეტაპს აშშ-ისა და სომხეთს შორის 25 წელზე მეტი ხნის ბირთვულ ენერგეტიკულ თანამშრომლობაში", — დაწერა კვიენმა სოციალურ ქსელ X-ზე.

ოთხშაბათს, Facebook-ზე გამოქვეყნებულ პოსტში სომხეთში ევროკავშირის წარმომადგენლობამ დაწერა, რომ ევროკავშირმა სომხეთს "დამატებით 17.9 მილიონი ევრო (21 მილიონი აშშ დოლარი) გამოუყო ბირთვული უსაფრთხოებისა და რადიოაქტიური ნარჩენების მართვის გასაუმჯობესებლად, ევროკავშირ-სომხეთის ყოვლისმომცველი და გაფართოებული პარტნიორობის შეთანხმების (CEPA) ფარგლებში."

ოთხშაბათს, სომხეთის ტერიტორიული ადმინისტრაციისა და ინფრასტრუქტურის მინისტრმა, დავით ხუდატიანმა, დანკანისა და კვიენის ხელმძღვანელობით დელეგაცია მიიღო. სამინისტროს მიერ ვიზიტთან დაკავშირებით გამოქვეყნებულ განცხადებაზე დაყრდნობით Armenpress-მა დაწერა, რომ ხუდატიანმა "განსაკუთრებული მადლიერება გამოხატა ელექტროსადგურზე ცოტა ხნის წინ დამონტაჟებული უახლესი ტექნოლოგიებით აღჭურვილი სიმულატორისთვის".

მათ ასევე "დაადასტურეს ორმხრივი მზაობა" თანამშრომლობის გაღრმავებაში და განიხილეს სომხეთ-აშშ-ის ენერგეტიკულ თანამშრომლობასთან დაკავშირებული "რიგი საკითხები", "მათ შორის, ბირთვული ენერგიის მშვიდობიანი გამოყენების კუთხით".

მეწამორის ელექტროსადგური კავკასიის რეგიონში ერთადერთი ატომური ელექტროსადგურია. მისი ერთადერთი მოქმედი რეაქტორი 1980 წელს ამოქმედდა და 2021 წელს სომხეთის ელექტროენერგიის 26% გამოიმუშავა.

ბოლო წლებში სომხეთმა რუსეთსა და აშშ-ს, სხვა ქვეყნებთან ერთად, მიმართა, რათა აეშენებინათ ახალი რეაქტორი მოძველებული ელექტროსადგურისთვის.

2023 წლის დეკემბერში სომხეთმა რუსეთის სახელმწიფო ბირთვულ სააგენტო Rosatom-თან კონტრაქტი გააფორმა მეწამორის ელექტროსადგურის სიცოცხლის ხანგრძლივობის 2036 წლამდე გაზრდის შესახებ, ხოლო მოძველებულ ობიექტზე ახალი რეაქტორის აშენებაზე მოლაპარაკებები "მიმდინარეობს".

2024 წლის ივლისში სომხეთმა განაცხადა, რომ სომხეთში ახალი ატომური ელექტროსადგურის აშენებასთან დაკავშირებით "არსებით" მოლაპარაკებებს აწარმოებდა.

გარემოსდაცვითმა აქტივისტებმა, თურქეთმა და ევროკავშირმა შეშფოთება გამოთქვეს სადგურის უსაფრთხოებასთან დაკავშირებით და მთავრობას მისი დახურვისკენ მოუწოდეს.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.