გასულ დღეებში ამერიკის შეერთებულ შტატებში ემიგრაციისა და საბაჟო აღსრულების სამსახურის (ICE) მიერ განხორციელებულმა რეიდებმა მასობრივი პროტესტები, ძალადობრივი დაპირისპირებები და ასობით ადამიანის დაკავება გამოიწვია.

6 ივნისს ლოს-ანჯელესში ICE-ის რეიდები, რომლის მიზანი ქვეყანაში არალეგალურად მყოფი პირების დაკავება იყო, 44 ადამიანის დაკავებით დაიწყო. მომდევნო დღეების განმავლობაში დაკავებულთა რაოდენობა 118-მდე გაიზარდა. ICE-ის წარმომადგენლები ადამიანებს აკავებდნენ სამსახურებში, უნივერსიტეტებში, არასრულწლოვანთა თანდასწრებით თუ საკუთარ სახლებში.

ICE-ის წარმომადგენელთა თქმით, რეიდები მიმართული იყო ემიგრაციის კანონების დარღვევის წინააღმდეგ, თუმცა აქტივისტები და უფლებადამცველები აცხადებენ, რომ ეს ქმედებები მიმართულია ლათინოამერიკელთა და ემიგრანტთა საზოგადოებების წინააღმდეგ და არღვევს ადამიანის ფუნდამენტურ უფლებებს.

რეიდებმა მალევე გამოიწვია ამერიკელთა უკმაყოფილება. ლოს-ანჯელესის ქუჩებში ათასობით ადამიანი გამოვიდა ICE-ის მოქმედებების წინააღმდეგ. პროტესტები სამართალდამცველებთან
დაპირისპირებაში გადაიზარდა — პარამაუნტისა და კომპტონის რაიონებში პოლიციამ გამოიყენა ცრემლმდენი გაზი, რეზინის ტყვიები და შოკური ბომბები. დემონსტრანტებმა მნიშვნელოვანი სატრანსპორტო მაგისტრალები გადაკეტეს, რა დროსაც პოლიციასთან შეტაკება მოხდა, დაიწვა რამდენიმე მანქანა და დაშავდა კერძო საკუთრებები.

6-7 ივნისს სამართალდამცველებმა პროტესტების დროს დააკავეს 100-ზე მეტი პირი. ლოს ანჯელესის პოლიციამ (LAPD) და კალიფორნიის საავტომობილო პატრულმა (CHP) ასევე დააკავეს მინიმუმ 27 აქტივისტი. დაშავებულია მინიმუმ 3 მოქალაქე და რამდენიმე სამართალდამცველი.

პროტესტების მასშტაბების ზრდის გამო, პრეზიდენტმა დონალდ ტრამპმა ლოს-ანჯელესში გაგზავნა ეროვნული გვარდიის 2,000-მდე წევრი. მათ დაევალათ "საჯარო წესრიგის დაცვა" და "რადიკალური მემარცხენეების მიერ გამოწვეული დესტაბილიზაციის აღკვეთა." პრეზიდენტის გადაწყვეტილებამ მწვავე კრიტიკა გამოიწვია — კალიფორნიის გუბერნატორმა, გევინ ნიუსომმა და ლოს-ანჯელესის მერმა, კარენ ბასმა საჯაროდ დაგმეს სამხედრო ძალის გამოყენება მშვიდობიანი დემონსტრანტების წინააღმდეგ და განაცხადეს, რომ განიხილავენ სამართლებრივ ნაბიჯებს ფედერალური ჩარევის წინააღმდეგ.

ეროვნული გვარდიის გამოძახების შემდეგ, 8 ივნისს სიტუაცია კრიტიკულად დაიძაბა ლოს-ანჯელესში. საემიგრაციო პოლიტიკის მოწინააღმდეგე ათიათასობით მოქალაქემ შეკრება ქალაქის სხვადასხვა ადგილზე დაიწყო, გადაკეტეს გზები და ეროვნულ გვარდიას პირდაპირ დაუპირისპირდნენ. გვარდიის მხრიდან რეზინის ტყვიებისა და ცრემლსადენი გაზის გამოყენებას დემონსტრანტები ქვებისა და ფეიერვერკების სროლით, ბარიკადების აღმართვითა და სამართალდამცველებთან ხელჩართული ჩხუბით დაუპირისპირდნენ. დაშავდნენ ჟურნალისტები, დემონსტრანტები და სამართალდამცველები. აქციაზე ჯამში 29 ადამიანი დააკავეს.

ICE-ის ოფიციალური განცხადების მიხედვით, რეიდები გაგრძელდება ემიგრაციის კანონის აღსასრულებლად. ტრამპის ადმინისტრაცია ხაზგასმით აცხადებს, რომ მისი მიზანია დღეში საშუალოდ 3,000 ადამიანის დაკავება, რაც დეპორტაციის მაჩვენებლის მკვეთრ ზრდას გულისხმობს.

ამ ეტაპზე უცნობია, რამდენი დაკავებული იქნა უკვე დეპორტირებული, თუმცა უფლებადამცველები შიშობენ, რომ პროცესები მიმდინარეობს გამჭვირვალობის და სამართლებრივი დაცვის გარეშე.