"პირველი ზღაპარი არ არის, რომელიც ბოკუჩავასგან მოვისმინეთ — გაწაფულია ეს ქალბატონი რაღაცების შეთხზვაში," — "ოცნების" პარლამენტის საპროცედურო საკითხთა და წესების კომიტეტის თავმჯდომარე, დავით მათიკაშვილი ჟურნალისტებთან საუბრისას ენმ-ს თავმჯდომარის, თინა ბოკუჩავას განცხადებას გამოეხმაურა.

მისი თქმით, თუ ვინმეს რაიმე პრეტენზია აქვს, შეუძლია სამართალდამცავ ორგანოებს მიმართოს.

"ამ ქვეყანას ჰყავს თავისი სამართალდამცავი ორგანოები, სასამართლო სისტემა და თუ ვინმეს პრეტენზიები გააჩნია, შეუძლია შესაბამის ორგანოებს მიმართოს. ბოკუჩავასგან რომ არაერთი სისულელე, ტყუილი და ზღაპარი გვაქვს მოსმენილო, კარგად ახსოვს საზოგადოებას," — განაცხადა მათიკაშვილმა.

ცნობისთვის, ერთიანობა ნაციონალური მოძრაობის თავმჯდომარემ, თინა ბოკუჩავამ ბრიფინგზე, განაცხადა, რომ მის მეუღლეს, კოტე იოსელიანს საცხოვრებელი სადარბაზოს მიმდებარე ტერიტორიაზე 5 ნიღბიანი პირი ჩაუსაფრდა, თავს დაესხა და გაიტაცა. მისივე თქმით, გამტაცებლები მის მეუღლეზე 8 საათის განმავლობაში ზეწოლას ახდენდნენ და ემუქრებოდნენ ბავშვების უსაფრთხოების ხელყოფით.

როგორც ბოკუჩავამ აღნიშნა, რომ ვარაუდობენ კოტე იოსელიანი "მრავალი საათის განმავლობაში იმყოფებოდა ე.წ მოდულის შენობაში".

ამასთან, ბოკუჩავას თქმით, მომხდარის რეალური მიზეზი მისი დაშინება და გაჩუმებაა.

შეგახსენებთ, გუშინ კოტე იოსელიანმა გაავრცელა ვიდეო, სადაც ბოდიშს უხდის ბიძინა ივანიშვილის შვილს, უტა ივანიშვილს რამდენიმე წლის წინ მისი მისამართით გაკეთებული განცხადების გამო.