მოსკოვში დაფუძნებული ტაქსების უმსხვილესი კომპანია იანდექს ტაქსი საქართველოსა და სხვა პოსტსაბჭოთა ქვეყნების ბაზრებზე შესვლას აპირებს. ამის შესახებ რუსულ გამოცემა ვედომოსტისთან ინტერვიუში განაცხადა კომპანიის გენერალურმა დირექტორმა ტიგრან ხუდავერიანმა. მისი თქმით, კომპანიის უახლოესი მომავლის პრიორიტეტებში შედის საქართველოსა და ბალტიის ქვეყნების ბაზარზე შესვლა. კომპანიამ ოპერირება 1 ივლისიდან უკვე დაიწყო ერევანში. კომპანია აპირებს უკრაინულ ბაზარზე შესვლასაც.

ბოლო მონაცემებით, იანდექს ტაქსი უკვე შესულია ყაზახეთისა და ბელორუსის ბაზარზე. გარდა ამისა, კომპანია მუშაობს მოსკოვსა და რუსეთის სხვა 20 მსხვილ ქალაქში. არსებული ინფორმაციით, იანდექს ტაქსს უკავია მოსკოვის ტაქსის ბაზრის 50%.

აღნიშნული კომპანიის სერვისი ინტეგრირებულია იანდექსის რუკებთან და მომხმარებლებს ტაქსის გამოძახება ოპერატორთან დაკავშირების გარეშე, ინტერნეტით შეუძლიათ. ეს არ არის ტაქსის პირველი რუსული კომპანია, რომელიც საქართველოში მუშაობს. იანდექს ტაქსამდე საქართველოში გასულ წელს შემოვიდა ტაქსი მაქსიმი.