ამერიკული ანალიტიკური ინსტიტუტი (Atlantic Council) ახალ კვლევას, შეჩერებისთვის შეიარაღებას, აქვეყნებს, რომელშიც რუსეთის მხრიდან მომავალი საფრთხეების შესახებ წერს. კვლევის შესავალში წერია, რომ NATO-ს აღმოსავლეთ რეგიონი, ცივი ომის დასრულების შემდეგ, ასეთი დიდი საფრთხის წინაშე პირველად დგას.

ანალიზში ვკითხულობთ, რომ რუსეთისგან მომავალი საფრთხე პირველ რიგში ბალტიისპირა ქვეყნებსა და პოლონეთს ემუქრება.

"რუსეთის პრეზიდენტი, ვლადიმერ პუტინი, დასავლეთის მიმართ თავის ნეგატიურ და მტრულ დამოკიდებულებას არ მალავს, რადგან დასავლური ღირებულებები რუსეთის კლეპტოკრატიული რეჟიმისთვის საფრთხეს წარმოადგენს", აღნიშნულია დოკუმენტში.

კვლევის ავტორების შეფასებით, რუსეთის პრეტენზიები NATO-ს მიმართ, რომ ალიანსი ქვეყანას ალყაში აქცევს, პარადოქსულია, რადგან ორგანიზაციის სამხედრო აქტივობა ვერაფრით შეედრება თავად რუსეთის მიერ გადადგმულ ნაბიჯებს, რომელიც ევროპულ ქვეყნებს პირდაპირი სამხედრო აგრესიით ემუქრება და სამეზობლოში არც სამხედრო ძალის გამოყენებას ერიდება. აქვე ნათქვამია, რომ რუსეთი მუდმივად ეძებს სისუსტეს და როგორც კი აღმოაჩენს, მაშინვე მოქმედებაზე გადადის:

"რუსეთის ნაბიჯებს იწვევს არა ძალის დემონსტრირება, არამედ სისუსტე, როგორც ეს უკრაინის შემთხვევაში მოხდა. როდესაც ოფიციალური კიევი საშინაო პრობლემებში იყო ჩაფლული და მობილიზაციისა და გარეშე საფრთხისგან თავდაცვის უნარი არ ჰქონდა, რუსეთმა სიტუაციით ისარგებლა და ყირიმში შეიჭრა".

კვლევის ავტორების აზრით, რუსეთის შეჩერება მხოლოდ ძალის დემონსტრირებითა და მის წინააღმდეგ პრინციპული პოზიციის დაკავებით შეიძლება. ამის მაგალითად კი 2008 წლის ომი მოჰყავთ:

"როდესაც აშშ-მ შავი ზღვისკენ საბრძოლო გემები დაძრა და საქართველოს ლოჯისტიკურ საკითხებში დახმარება აღუთქვა, რუსულმა არმიამ თბილისისკენ სვლა შეაჩერა".

სამხედრო მოქმედებების დაწყების გადაწყვეტილებას ვლადიმერ პუტინი და მისი კაბინეტის რამდენიმე სანდო პიროვნება ექსკლუზიურად, საპარლამენტო შტოსა და კონსტიტუციის უგულებელყოფით იღებენ. შედეგად, პუტინს ნებისმიერ დროს შეუძლია აღასრულოს ნებისმიერი სახის სამხედრო მოქმედება. ამავდროულად, მის ხელშია დიპლომატიური, ციფრული, უშიშროებისა და მედია პროპაგანდის აურაცხელი რაოდენობის რესურსი.

ანალიზში ნათქვამია, რომ რუსეთი ალიანსის წევრ ქვეყანაზე პირდაპირ სამხედრო აგრესიას შეიძლება მოერიდოს, თუმცა ე.წ. ჰიბრიდული ომის წამოწყებისგან თავს არ შეიკავებს.

რუსეთი გენერალური შტაბის უფროსი ვალერი გერასიმოვი, 2013 წელს, გაზეთ Военно-промышленный курьер (სამხედრო-სამრეწველო კურიერი) ე.წ. ჰიბრიდულ ომს აღწერს და აღნიშნავს, რომ სამხედრო მოქმედებების წესები და მეთოდები შეიცვალა. მისი თქმით, ახლა ძირითადი ფოკუსი საინფორმაციო და ეკონომიკურ ომზეა გადატანილი, რასაც ემატება კონკრეტული ქვეყნის მოსახლეობის საპროტესტო აქციების წამოწყების პოტენციალი.

"რუსეთი თავადაც ხვდება, რომ NATO-ს სამხედრო პოტენციალს კონკურენციას ვერ გაუწევს, თუმცა რეგიონში უპირატესი სამხედრო ბალანსის შესაქმნელად საკმარისი საბრძოლო რესურსი აქვს", ვკითხულობთ ანალიზში. დოკუმენტში აღნიშნულია, რომ მოულოდნელობის ეფექტი და სამხედრო მოქმედებების სისწრაფე ხსენებული უპირატესობის ნაწილია, რაც თავისთავად საფრთხეს უქმნის პოლონეთსა და ბალტიისპირა ქვეყნებს:

"ამ კუთხით 5 ელემენტი უნდა გავითვალისწინოთ:

• რუსეთის არმიის მოდერნიზება
• გაუვალი და შეუღწევადი ზონების შექმნის სტრატეგია (A2/AD)
• ატომური სტრატეგია
• მუდმივი სამხედრო წვრთნები
• კრემის გარშემო არსებული ბუნდოვანება"

კვლევის ავტორებს შემაშფოთებლად მიაჩნიათ ის ფაქტი, რომ მიუხედავად იმისა, რომ მოსკოვს არასოდეს დაუმალავს და შეუნიღბავს თავისი მიზნები, NATO-სა და დასავლეთის ქვეყნებს ხშირად უკვირთ რუსეთის ქმედებები - მაგალითად, 2008 წლის ომი საქართველოს წინააღმდეგ, და 2014 წლის ყირიმის ანექსია:

"დასავლეთს არ ესმის რუსეთის, მათ ჰგონიათ, რომ მოსკოვი წესებს დაემორჩილება იმ შემთხვევაშიც კი, თუ მას არ ვაიძულებთ. NATO-ს ჰგონია, რომ საერთაშორისო ურთიერთობებისა და უსაფრთხოების კუთხით, რუსეთიც ალიანსის მსგავსი ლოგიკით მოქმედებს. თუმცა, კრემლის ლოგიკა ასეთია - იმოქმედოს ყოყმანის გარეშე და გაატაროს საკუთარი ინტერესები მაშინვე, როგორც კი ამის შესაძლებლობა იქნება".

ანალიტიკოსების თქმით, მართალია, ჯერ-ჯერობით არ არსებობს იმის მოლოდინი, რომ რუსეთი NATO-ს პირდაპირ დაუპირისპირდება, მაგრამ ეს სიტუაცია შეიძლება ერთ ღამეში შეიცვალოს. მოსკოვმა შესაძლებელია დასავლეთის უყურადღებობით და სხვა კრიზისზე გადართულობით ისარგებლოს და სწორედ ამ დროს გადადგას ეს ნაბიჯი.