საქართველოს პრეზიდენტის, გიორგი მარგველაშვილის განცხადებით, ქვეყნის ოკუპირებული ტერიტორიები საერთაშორისო მონიტორინგის მიღმა არ უნდა დარჩეს. ამის შესახებ მარგველაშვილმა საქართველოში ვიზიტით მყოფ ევროპის უსაფრთხოებისა და თანამშრომლობის ორგანიზაციის - ეუთოს ელჩებთან შეხვედრისას განაცხადა.

როგორც პრეზიდენტის პრესსამსახურის მიერ გავრცელებულ განცხადებაშია ნათქვამი, შეხვედრაზე ყურადღება ოკუპირებულ ტერიტორიებზე არსებულ ვითარებაზე, ადამიანების გატაცებაზე, წამებასა და ადამიანის უფლებათა დარღვევის საკითხებს დაეთმო.

"გიორგი მარგველაშვილმა ეუთოს წევრი ქვეყნების ელჩებს დეტალური ინფორმაცია მიაწოდა იმ პოლიტიკის შესახებ, რომელსაც რუსეთის ფედერაცია ახორციელებს რეგიონში და პრეზიდენტმა მადლობა გადაუხადა ელჩებს იმ დახმარებისათვის, რასაც საქართველო გრძნობს ტერიტორიული მთლიანობის, სუვერენიტეტის მხარდაჭერისა და არაღიარების პოლიტიკის მიმართულებით", - აღნიშნულია უწყების პრესსამსახურის მიერ გავრცელებულ განცხადებაში.