საქართველოს პარლამენტის თავმჯდომარის ირაკლი კობახიძის განცხადებით, საქართველოს პარლამენტი საქართველოს პრეზიდენტს რიგგარეშე პლენარული სხდომის ჩანიშვნის მოთხოვნით მიმართავს. აღნიშნული სხდომა, ქუთაისში 20 ივნისს უნდა ჩაინიშნოს, რათა პარლამენტმა მთავრობის არსებულ კაბინეტს ნდობა გამოუცხადოს.

18 ივნისის ბიუროს სხდომაზე ასევე გაიწერა გრაფიკი, რომლის მიხედვითაც მთავრობის შემადგენლობას კომიტეტებზე მოუსმენენ. საკომიტეტო მოსმენები 19 ივნისს 10:00-დან დაიწყება და მინისტრებს, თემატურად გაერთიანებულ კომიტეტებზე მოუსმენენ.

კობახიძემ განმარტა, რომ შემჭიდროვებულ ვადებში მთავრობის დამტკიცების პროცედურა, უკავშირდება იმ პროცესებს, რომელიც მთავრობისთვის ნდობის გამოცხადების შემდეგ უნდა განვითარდეს.

მას შემდეგ, რაც მთავრობის არსებულ შემადგენლობას ნდობას გამოუცხადებენ, შემუშავდება სტრუქტურული ცვლილებების შესახებ კანონპროექტი, რის შემდეგაც კობახიძის თქმით, შეიცვლება მთავრობის შემადგენლობაც, სამოქმედო გეგმაც და პარლამენტს ერთი და იგივე პროცედურის გავლა ორჯერ მოუწევს.

არსებული მთავრობისთვის ნდობის გამოცხადების პროცედურას ეგზოტიკურს უწოდებენ ევროპულ საქართველოში. დეპუტატ სერგო რატიანის რეპლიკაზე პროცესის ეგზოტიკურობასთან დაკავშირებით, კობახიძემ უპასუხა, რომ პარლამენტს რამდენიმეკვირიან ინტერვალში ორჯერ მთავრობისთვის ნდობის გამოცხადება უწევს და ვადების საკითხი სამართლებრივია.

საქართველოს პრემიერ-მინისტრობის კანდიდატის, მამუკა ბახტაძის განცხადებით, მთავრობა პარლამენტში ნდობის გამოსაცხადებლად არსებული შემადგენლობით წარდგება.

მისი განმარტებით, სამთავრობო ცვლილებები მას შემდეგ განხორციელდება, რაც მთავრობის შემადგენლობაში სტრუქტურული ცვლილებები შევა და კანონის დონეზე დამტკიცდება. მამუკა ბახტაძემ დააანონსა, რომ სამინისტროების რაოდენობა 14-დან 11-მდე შემცირდება.

ქართული ოცნების მმართველობის პერიოდში მესამე პრემიერ-მინისტრმა გიორგი კვირიკაშვილმა 13 ივნისს პრემიერ-მინისტრის თანამდებობა დატოვა და ამის მიზეზად გუნდში არსებული აზრთა სხვადასხვაობა დაასახელა. საქართველოს კონსტიტუციის თანახმად, პრემიერის გადადგომასთან ერთად, მთავრობის შემადგენლობაც გადამდგარად ითვლება.