მას შემდეგ, რაც პრეზიდენტი გიორგი პაპუაშვილს შეხვდა, პრესკონფერენცია გამართა და განაცხადა, რომ პაპუაშვილის მონათხრობმა ის არ გააოცა, რადგან სამართალდამცავების მხრიდან 1 თვის წინ მისი ოჯახის წევრზეც იყო ზეწოლის განხორციელების მცდელობა:

"ეს იყო იმიტაცია რეალურად და აქიდან გამომდინარე ის, რაც ბატონმა პაპუაშვილმა მითხრა, ჩემთვის გასაოცარი არ არის. ეს იყო ზეწოლა ჩემი ოჯახის წევრზე რომელიც გააჩერეს ქუჩაში და მერე მის სახლში ჩაატარეს ჩხრეკა ყოველგვარი სასამართლოს დადგენილების გარეშე, რაღაცა იმედით, რომ ამას რაღაც მოჰყვებოდა. ბუნებრივია, აბსოლუტურად სუფთა იყო ყველაფერი და არანაირი სამართალ დარღვევა არ იყო, მაგრამ იქ იყო გარკვეული მინიშნებები რომ ეს არის სწორედ ამ პიროვნებაზე ზეწოლის მცდელობა.

მე დღეს ვესაუბრე ბატონ გიორგის და მან მე კონკრეტული ფაქტები დამისახელა. ეს კონკრეტული ფაქტები გამომდინარე იქიდან, რომ ეხება უმნიშვნელოვანეს სახელმწიფო ინსტიტუტს - ისეთს, როგორიც არის საკონსტიტუციო სასამართლო და ისეთ თანამდებობის პირებს, როგორებიც არიან საკონსტიტუციო სასამართლოს მოსამართლეები, რომელთაც უმაღლესი დაცვის ხარისხი აქვთ ჩვენი კონსტიტუციის მიხედვით, თავისთავად ეს ფაქტი არის შემაშფოთებელი".

მან ასევე ხაზი გაუსვა კორცხელის ინციდენტის გამოძიების მნიშვნელობას და განმარტა, რომ თუ აღნიშნულ ინციდენტზე სამართალდამცავი უწყება ადეკვატურ პასუხს გასცემს, ეს გარკვეულ ტენდენციებისა და ბიძგების მიმცემი იქნება. ამასთან მან განაცხადა, რომ აღნიშნულში პრემიერმინისტრი არანაირ მონაწილეობას არ იღებს და მზადყოფნა გამოთქვა კვირიკაშვილთან და დავით უსუფაშვილთან შესახვედრად:

"ეს სინდრომი, განსაკუთრებით არჩევნების პროცესში, იქნება ძალიან რთული ყველასთვის. ჩვენ ძალიან ნათელი პასუხი უნდა გავცეთ იმას, როდესაც ხდება პოლიტიკურ ძალებსა და რაღაც ჯგუფებს შორის შეთანხებული მოქმედება. ხაზგასმით მინდა ვთქვა, რომ საქართველოს პრემიერმინისტრი აბსოლუტურად არ არის ჩართული ამ საქმეებში. მაგრამ ამავდროულად ჩნდება ტენდენციები დაბალ დონეზე რაღაც კავშირების ჩამოყალიბების".

მან ასევე განმარტა, რომ საკონსტიტუციო სასამართლოს თავჯდომარის განცხადებებზე სხვადასხვა პოლიტიკოსის მიერ გაკეთებული კომენტარები იყო ხმამაღალი:

"როდესაც ასეთ მაღალი თანამდებობის პირი აცხადებს ასეთ მნიშვნელოვან სახელმწიფო ინსტიტუტზე ზეწოლის შესახებ, მე ვფიქრობ, რომ ამაზე უნდა იყოს პოლიტიკოსების შეშფოთება და, ბუნებრივია, უნდა იყოს ამ საქმეში დეტალურად გარკვევის მცდელობა".

21 ივლისს საკონსტიტუციო სასამართლოს თავჯდომარემ, გიორგი პაპუაშვილმა განაცხადა, რომ რომ სასამართლოს მოსამართლეებზე და მათ ახლობლებზე ზეწოლა, თვალთვალი და მუქარა მიმდინარეობს.

• პაპუაშვილი: საკონსტიტუციოს მოსამართლეებზე ზეწოლა და თვალთვალი მიმდინარეობს
• გიორგი პაპუაშვილი პროკურატურაში დაკითხვაზე დაიბარეს