Amnesty International-ის ინფორმაციით, თურქეთში დაკავებულებს აუპატიურებენ, აწამებენ და სცემენ.

ორგანიზაცია დამოუკიდებელ მონიტორინგის ჯგუფებს მოუწოდებს, რათა წვდომა ჰქონდეთ ყველა იმ პატიმართან, რომლებიც სახელმწიფო გადატრიალების მცდელობის შემდეგ დააკავეს. დაკავებულთა შორის არიან პოლიციისა და სასამართლოს ხელმძღვანელი პირები. ამ დროისთვის 10 000-ზე მეტი პირია დაკავებული.

ორგანიზაციის განცხადებით, მათ აქვს უტყუარი მტკიცებულებები იმისა, რომ ანკარისა და სტამბოლის პოლიცია დაკავებულებს სტრესულ მდგომარეობაში ამყოფებს, საჭმლის, წყლისა და სამედიცინო დახმარების გარეშე.

Amnesty International ასევე წერს, რომ პოლიციელები დაკავებულებს ვერბალურ შეურაცხყოფას აყენებენ და ემუქრებიან:

"არის უარესი შემთხვევებიც, როდესაც პოლიციელებმა სასტიკად სცემეს პატიმარს, აწამეს და გააუპატიურეს".

Amnesty ასევე წერს, რომ დაკავებულებს ადვოკატებთან და ოჯახის წევრებთან შეხვედრის საშუალება არ ეძლევათ:

"ისინი არ არიან სწორად ინფორმირებულები იმის შესახებ, თუ რა ბრალდება აქვთ წაყენებული".

რამდენიმე დღის წინ, თურქეთის მთავრობამ გამოსცა ახალი ბრძანებულება, რომლის მიხედვით მკვეთრად, 4-დან 30 დღემდე გაიზარდა დაკავებულის წინასწარი მოთავსების იზოლატორში გაჩერების ხანგრძლივობა, ბრალის წაყენების გარეშე.

Amnesty წერს, რომ აღნიშნული ცვლილება შეიცავს დაკავებულთა წამების რისკებს.