ACT-ის კვლევის მიხედვით, საქართველოს მოსახლეობის 44% თვლის, რომ მათ დასახლებაში ჰაერი დაბინძურებულია. შედეარებით ნაკლები რაოდენობა, 37 პროცენტი, მიიჩნევს, რომ ნიადაგია დაბინძურებული, ხოლო გამოკითხულთა 33% ამბობს, რომ დაბინძურებულია ბუნებრივი წყლის რეზერვუარები.

ეისითის კვლევის შედეგებში იკვეთება, რომ სოფელში რეალობა რადიკალურად განსხვავებულია ქალაქისგან. თუ თბილისში რესპოდენტთა 89%, სხვა ქალაქებში კი – 48% აცხადებს, რომ მათ დასახლებაში ჰაერი დაბინძურებულია, სოფელში რესპოდენტთა მხოლოდ 12% ამბობს იგივეს. ნიადაგისა და ბუნებრივი წყლის რეზერვუარებთან დაკავშირებით ქალაქსა და სოფელს შორის განსხვავება ფაქტობრივად არ ფიქსირდება. რეგიონების მიხედვით, ყველაზე ნაკლებად ეს პრობლემა რაჭა-ლეჩხუმი/ქვემო სვანეთის მოსახლეობას აწუხებს.

მონაცემების მიხედვით, გარემოს დაბინძურებას ქალები უფრო მეტად აქცევენ ყურადღებას, ვიდრე კაცები. ეს ეხება როგორც ჰაერის, ასევე ნიადაგისა და ბუნებვრივი წყლის რეზერვუარების შეფასებისას.

ფოტო: ACT

კვლევა ეისითიმ 2017 წლის მარტში ჩაატარა გაეროს განვითარების პროგრამის (UNDP), სამხრეთ კავკასიაში შვეიცარიის განვითარებისა და თანამშრომლობის (SCO) ოფისისა და ავსტრიის განვითარების სააგენტოს (ADC) დაკვეთით. მოსახლეობის საზოგადოებრივი მომსახურებით კმაყოფილების დონის დასადგენად, საქართველოს მაშტაბით 3400 ზრდასრული რესპოდენტი გამოიკითხა. კვლევის სრულ შედეგებს შეგიძლიათ გაეცნოთ ამ ბმულზე.