ძიუდოს ფედერაციის პრეზიდენტმა, დავით ქევხიშვილმა განაცხადა, რომ აღმასკომის წევრებისგან უკვე აქვს უახლოეს დღეებში ძიუდოისტებისთვის ახალი მწვრთნელის დანიშვნის ნებართვა. ამის შესახებ მან დღეს, 28 მაისს, გამართული აღმასკომის სხდომის შემდეგ ისაუბრა.

ჰოლიდეი ინში ქევხიშვილმა ძიუდოისტებს ლუი სვაიდენბოში წარუდგინა, რასაც სხდომაზე არაერთგვაროვანი რეაქცია მოჰყვა. ქევხიშვილის თქმით, მწვრთნელობის კანდიდატმა აღმასკომის წევრების მოწონება დაიმსახურა, თუმცა პარლამენტის სპორტის კომიტეტის თავმჯდომარის პირველმა მოადგილემ, შოთა ხაბარელმა პროტესტის ნიშნად სხდომა დატოვა.

როგორც ხაბარელი ჟურნალისტებთან საუბრისას ამბობს, მისთვის ქევხიშვილის პოზიცია მიუღებელია, რადგან ძიუდოისტები ვარჯიშის დაწყებას არ აპირებენ და ახალი მწვრთნელის დანიშვნის საჭიროება არ არსებობს.

"მათ არ აინტერესებთ ძიუდო, საკუთარი პირადი ინტერესებიდან გამომდინარე ხდება ეს ყველაფერი. ესაა ესლაკაცია იქითკენ, რომ ხვალ 10 000 ადამიანი გამოვიდეს და მიეცეს ამას პოლიტიკური დატვირთვა"-, აცხადებს შოთა ხაბარელი.

ძიუდოს ფედერაციის პრეზიდენტის თქმით, მწვრთნელის ცვლილება ადეკვატური ნაბიჯია.

"ჩვენ გვაქვს ჩვენი საქმე, ჩვენს საქმეს გავაკეთებთ ბოლომდე და, შესაბამისად, შედეგს ვნახავთ უახლოეს მომავალში",- განაცხადა ძიუდოს ფედერაციის პრეზიდენტმა.

ძიუდოისტების პროტესტი

ძიუდოს ნაკრების რამდენიმე წევრი, გუნდის კაპიტან ვარლამ ლიპარტელიანთან ერთად ფედერაციის პრეზიდენტის, დავით ქევხიშვილის გადადგომას ითხოვს. ძიუდოისტები ქევხიშვილის გადადგომის მოთხოვნის მიზეზს, ერთი მხრივ, ნაკრების წარუმატებლობასა და მეორე მხრივ, ფედერაციაში არსებულ მძიმე და უსიამოვნო სიტუაციას უკავშირებენ.

სპორტსმენები აცხადებენ, რომ თუ დავით ქევხიშვილი არ გადადგება, ისინი საერთაშორისო ტურნირებში მონაწილეობას აღარ მიიღებენ. როგორც ქევხიშვილის ამბობს, ის გადადგომას არ აპირებს.

აპრილის ბოლოს ევროპის ჩემპიონატიდან უმედლოდ დაბრუნების შემდეგ ძიუდოს ნაკრების მთავარმა მწვრთნელმა, ირაკლი ცირეკიძემ გუნდი დატოვა, გადადგა მთელი სამწვრთნელო შტაბი.

კულტურისა და სპორტის მინისტრმა, მიხეილ გიორგაძემ თქვა, რომ ფედერაციაში არსებული პრობლემის შესასწავლად სამინისტროს, პარლამენტის სპორტის კომიტეტისა და ოლიმპიური კომიტეტის ერთობლივი კომისია შეიქმნა. მისივე განმარტებით, კომისიამ უკვე გამოითხოვა ფედერაციიდან ინფორმაცია და მისი შესწავლის შემდეგ შედეგები გასაჯაროვდება.

10 მაისს ხმაურით ჩაიარა ძიუდოს ფედერაციის ყრილობამ. ძიუდოს ფედერაციის პრეზიდენტის, დავით ქევხიშვილის განმარტებით, მან დღემდე ვერ მოისმინა არგუმენტი რატომ უნდა გადადგეს. მისივე თქმით, ულტიმატუმების გზით პროცესის წაყვანა არ შეიძლება და პასუხისმგებლობა ყველამ უნდა აიღოს.

გაიგეთ მეტი:

• დაგვაბრუნეთ ტატამზე - ძიუდოისტები ბიძინა ივანიშვილთან და გიორგი კვირიკაშვილთან შეხვედრას მოითხოვენ