მიუხედავად იმისა, რომ შინაგან საქმეთა მინისტრმა გიორგი გახარიამ პარლამენტთან შეკრებილ აქტივისტებს პირობა მისცა, რომ ნარკოპოლიტიკის რეფორმის მიღების პროცესი დაჩქარდება, პარლამენტში კანონპროექტთან დაკავშირებით ისევ აზრთა სხვადასხვაობაა.

უმრავლესობის დეპუტატებს ნაწილი ნარკოპოლიტიკის რეფორმას, რომელიც პარლამენტში ნარკოპოლიტიკის ეროვნულმა პლატფორმამ დაარეგისტრირა, ისევ ეწინააღმდეგება, ნაწილი კი ნარკოპოლიტიკის მხოლოდ კონკრეტული გზებით შემსუბუქების მომხრეა. საპარლამენტო ოპოზიცია იზიარებს ლიბერალური ნარკოპოლიტიკის იდეას და რეფორმის მომხრეა.

ნარკოპოლიტიკის ლიბერალიზაციას ეწინააღმდეგება ფრაქცია "ქართული ოცნების" წევრი ზვიად ძიძიგური. ის შინაგან საქმეთა სამინისტროს ნაბიჯს იწონებს და აღნიშნავს, რომ "ყოველგვარი დეკრიმინალიზაციის წინააღმდეგია" და არ უნდა გადაიდგას ისეთი ნაბიჯები, რომელიც ნარკომომხმარებლების რაოდენობას გაზრდის.

"ყველა ნაბიჯი, რომელიც იქნება გადადგმული ნარკორეალიზატორების გამოსავლენად და მათი იზოლირებისთვის, იქნება, მხოლოდ და მხოლოდ, მისასალმებელი", - ამბობს ზვიად ძიძიგური.

პარლამენტარ დიმიტრი ხუნდაძეს მიაჩნია, რომ კანონპროექტი პარლამენტში უნდა განიხილებოდეს და არა ქუჩაში. ხუნდაძე, ასევე, აცხადებს, რომ ქვეყანაში ნარკოპოლიტიკა უნდა შეიცვალოს, თუმცა ეს არ უნდა მოხდეს ნარკოტიკების პოპულარიზაციის გზით.

"ნარკოპოლიტიკა შესაცვლელია, მაგრამ უნდა იყოს სწორი მთავარი მიზანი დასახული, რომ მივიღოთ იმდაგვარი სამართლებრივი რეგულაციები, რომლებიც ხელს შეუწყობს ქვეყანაში ნარკოტიკების რიცხვის შემცირებას და არა - პირიქით, გაზრდას", - განაცხადა დიმიტრი ხუნდაძემ.

პარლამენტის თავმჯდომარის პირველი მოადგილე თამარ ჩუგოშვილი ახალგაზრდების უკმაყოფილების ერთ-ერთ მიზეზად რეფორმაზე მუშაობის გაჭიანურებას ასახელებს.

"ბუნებრივია, რომ ახლა ჩენ მოგვიწევს უკვე ძალიან ფორსირებულად და დაჩქარებულად ნარკოპოლიტიკის რეფორმაზე მუშაობა",- აცხადებს ქართული ოცნების წევრი.

ნარკოპოლიტიკის ჰუმანიზაციისა და მსუბუქი მოხმარების ნარკოტიკების დეკრიმინალიზაციის მომხრეა ნაციონალური მოძრაობის თავმჯდომარე, რომან გოცირიძე. მისი განცხადებით, მინისტრმა მოლაპარაკებები უნდა აწარმოოს არა მხოლოდ იმ ადამიანებთან, რომლებიც შსს-მ დაარბია, არამედ ხალხთანაც, რადგან "ეს მოვლენა ქვეყნის საქმეა".

პარლამენტში საპოლიციო ძალების მხრიდან კანონის დაცვის პრიორიტეტულობაზეც საუბრობენ. ევროპული საქართველოს თავმჯდომარის, ოთარ კახიძის თქმით, ამ მოვლენაში მთავარია პოლიციელთა მხრიდან კანონის დაცვა, ხოლო ნარკოპოლიტიკაზე მსჯელობა მეორეხარისხოვანია.

მისივე განცხადებით, ხელისუფლება საზოგადოებას ნარკოპოლიტიკასთან დაკავშირებით 6 წლის განმავლობაში კონკრეტულ ხედვას ვერ სთავაზობს.

"ამასთან დაკავშირებითაც, როგორც ყველა სხვა საკითხზე ისინი არიან არაკომპეტენტურები და არათანმიმდევრულები.",- ამბობს კახიძე.